കേരളം നേരിടുന്ന പ്രതിസന്ധി - സാമൂഹ്യ മാറ്റം അനിവാര്യമാക്കുന്ന പശ്ചാത്തലം. - ജോസഫ് തോമസ്

കേരളം അക്ഷരാര്‍ത്ഥത്തില്‍ 'ദൈവത്തിന്റെ' നാടായി മാറിയിരിക്കുന്നു. കൂടുതല്‍ കൂടുതല്‍ ആളുകള്‍ പണിയെടുക്കാതെ ദൈവാനുഗ്രഹം പ്രതീക്ഷിച്ചു് കഴിയുന്നവരായി മാറുന്നു. ആരാധനാലയങ്ങള്‍ക്കും തീര്‍ത്ഥാടന കേന്ദ്രങ്ങള്‍ക്കും ആള്‍ ദൈവങ്ങള്‍ക്കും പിന്നാലെ പായുന്നു. ഭൂമി, കെട്ടിടം, ഭക്ഷണം, വിദ്യാഭ്യാസം, രോഗ ചികിത്സ തുടങ്ങിയവയുടെ ഊഹക്കച്ചവടം നടത്തി അതിവേഗം പണം സമ്പാദിക്കുകയാണു് വര്‍ദ്ധിച്ചു് വരുന്ന ജീവിത മാര്‍ഗ്ഗം. അദ്ധ്വാനിച്ചു് സമ്പത്തുണ്ടാക്കുന്നവരേക്കാള്‍ കൂടുതല്‍ തട്ടിപ്പു് കൊണ്ടു് വരുമാനം നേടാനാവുമ്പോള്‍ സാധ്യമായവരൊക്കെ ആ മേഖലയിലേയ്ക്കു് മാറുക സ്വാഭാവികം.

ഭൂമിയുടെ വില കൂട്ടാനായി നിലവും തണ്ണീര്‍ തടങ്ങളും നീര്‍ച്ചാലുകളും ജല സ്രോതസുകളും നികത്തുന്നു. അതിനായി ജല സംഭരണികളായ തണ്ണീര്‍പ്പാടങ്ങള്‍ സംരക്ഷിച്ചു് നിര്‍ത്തുന്ന മലകള്‍ ഇടിച്ചു് നിരത്തുന്നു. മഴക്കാലത്തു് മണ്ണൊലിപ്പു് കൂടുന്നു. വെള്ളം കുത്തിയൊലിച്ചു് മണ്ണിലിറങ്ങാതെ അതി വേഗം കടലിലെത്തുന്നു. തണ്ണീര്‍ തടങ്ങള്‍ നികത്തപ്പെടുന്നതു് മൂലം താമസ സ്ഥലത്തും റോഡുകളിലും മഴക്കാലത്തു്, അല്പ സമയത്തേയ്ക്കോ ഏതാനും ദിവസങ്ങളോ ആണെങ്കിലും വെള്ളക്കെട്ടു് പ്രശ്നം സൃഷ്ടിക്കുന്നു. വേനലായാല്‍ കുടി വെള്ള ക്ഷാമം തുടങ്ങുന്നു. കിണറുകള്‍ വറ്റി വരളുന്നു. ആശ്രയമോ, ടാങ്കര്‍ വെള്ളം. പൈപ്പു് വെള്ളം. കുപ്പി വെള്ളം. കുടിവെള്ള കച്ചവടം പൊടി പൊടിക്കുന്നു. ഓരോ വര്‍ഷം കഴിയുന്തോറും വെള്ളക്കെട്ടും കുടിവെള്ള ക്ഷാമവും രൂക്ഷമായിക്കൊണ്ടിരിക്കുന്നു.

കൃഷി ഒരു കൂട്ടായ്മയാണു്. ചിലര്‍ ഭൂമി നികത്തുന്നതു് മറ്റുള്ളവരേയും കൃഷിയില്‍ നിന്നു് പിന്തിരിപ്പിക്കുന്നു. കൃഷി അസാദ്ധ്യമാകുന്നു. ഭക്ഷണത്തിനു് അന്യ പ്രദേശങ്ങളെ ആശ്രയിക്കേണ്ടി വരുന്നു. ഭക്ഷ്യ വസ്തുക്കളുടെ വില ക്രമാതീതമായി ഉയരുന്നു. അതു് ജീവിത ചെലവു് ഉയര്‍ത്തുന്നു. ഭൂമിയുടെ ഊഹക്കച്ചവടം മൂലം വില വര്‍ദ്ധിക്കുന്നതു് സാധാരണക്കാര്‍ക്കു് കിടപ്പാടം അപ്രാപ്യമാക്കുകയും ചെയ്യുന്നു. ക്രമേണ കേരളത്തിന്റെ സവിശേഷതയായ ആണ്ടോടാണ്ടു് വറ്റാത്ത നീര്‍ച്ചാലുകളും പച്ചപ്പും തന്നെ അപ്രത്യക്ഷമായി കഴിഞ്ഞിരിക്കുന്നു. പരിസ്ഥിതി സംരക്ഷണം കേരളം ഏറ്റെടുക്കേണ്ട ഒരു അടിയന്തിര പരിപാടിയാണു്. കേരളത്തിനു് അതിനായി ഒരു മാസ്റ്റര്‍പ്ലാന്‍ ഉണ്ടാകേണ്ടിയിരിക്കുന്നു.

ഉല്പാദന രംഗം പ്രതിസന്ധിയിലാണു്. കൃഷി നാശോന്മുഖമാണു്. ഭൂമി ഭൂമാഫിയകള്‍ തട്ടിയെടുക്കുന്നു. കെട്ടിടനിര്‍മ്മാണം മാത്രമാണു് വികസിക്കുന്ന ഒരു മേഖല. പക്ഷെ, അതും ആരോഗ്യകരമായ പ്രവണതയല്ല കാട്ടുന്നതു്. ഭൂമിയിലും കെട്ടിടത്തിലും നടക്കുന്ന ഊഹക്കച്ചവടം വില ക്രമാതീതമായി ഉയര്‍ത്തുന്നു. അതു് ധനമൂലധന വിളയാട്ടത്തിന്റെ മേഖലയായി മാറിയിരിക്കുന്നു. നടക്കുന്ന നിര്‍മ്മാണ പ്രോജക്ടുകള്‍ തന്നെ വാങ്ങുന്നവരെ കൊള്ളയടിക്കുന്നവ മാത്രമായി മാറിക്കൊണ്ടിരിക്കുന്നു. ആവശ്യമായ നിയമം പതിറ്റാണ്ടുകള്‍ക്കു് മുമ്പു് നിലവിലുണ്ടായിരുന്നിട്ടും, ഫ്ലാറ്റുകളുടെ ഉടമസ്ഥത വാങ്ങുന്നവരിലേയ്ക്കു് ബില്‍ഡര്‍മാര്‍ കൈമാറുന്നില്ല.  ഉടമസ്ഥത കൈവശം വെച്ചു് ചൂഷണം സ്ഥായിയി തുടരാന്‍, ബില്‍ഡര്‍മാരെ, അവരും, അഴിമതിക്കാരായ, ഉദ്യോഗസ്ഥരും രാഷ്ട്രീയക്കാരും അടങ്ങുന്ന കേരളം ഭരിക്കുന്ന, അവിഹിത, കൂട്ടു്കെട്ടു് അനുവദിച്ചിരിക്കുന്നു. വാങ്ങുന്നവര്‍ പൂര്‍ണ്ണ അവകാശം തങ്ങള്‍ക്കുണ്ടെന്നു് തെറ്റിദ്ധരിപ്പിക്കപ്പെട്ടിരിക്കുന്നു.

വ്യവസായങ്ങളെല്ലാം തകര്‍ച്ച നേരിടുകയാണു്. കേന്ദ്ര പൊതു മേഖലയും സംസ്ഥാന പൊതു മേഖലയും നഷ്ടത്തിലേയ്ക്കു് മുതലക്കൂപ്പു് കുത്തുന്നു. ലാഭം കാട്ടുന്നവ തന്നെ കണക്കിലെ കളികളിലൂടെയാണു്. വിവര സാങ്കേതിക വ്യവസായം വികസിപ്പിക്കാന്‍ ശ്രമം നടന്നെങ്കിലും അതു് വിജയിക്കുന്നില്ല. പുറം കരാര്‍ പണികളല്ലാതെ മറ്റൊന്നും രക്ഷപ്പെടുന്നില്ല. വ്യവസായാടിത്തറ വികസിപ്പിക്കത്തക്ക തരത്തില്‍ സാങ്കേതിക വിദ്യ സ്വാംശീകരിക്കപ്പെടുന്നില്ല. സാങ്കേതിക വിദ്യാ സ്വാംശീകരണം അസാദ്ധ്യമായ സ്വകാര്യ കുത്തക സാങ്കേതികോപകരണങ്ങളാണു് മലയാളികള്‍ കൂടുതലായി ഉപയോഗിക്കുന്നതു്. നിക്ഷേപ മൂലധനത്തിന്റെ ഒഴുക്കു് ലാഭ സാധ്യതയെ ആശ്രയിച്ചാണിരിക്കുന്നതു്. യാഥാര്‍ത്ഥ്യങ്ങള്‍ക്കു് നിരക്കാത്ത വ്യവസായവികസന പരിപാടികള്‍ വ്യവസായം കൊണ്ടുവരാന്‍ പര്യാപ്തമല്ല. അവ ആഗോള ധന മൂലധനകുത്തകകളുടെ വ്യാപനത്തെ സഹായിക്കുകയേ ഉള്ളു.  ധനമൂലധന നിക്ഷേപത്തെ ആശ്രയിച്ചുള്ള വ്യവസായ വികസന പരിപ്രേക്ഷ്യം കേരളം നേരിടുന്ന പ്രശ്നങ്ങള്‍ക്കു് പരിഹാരം കാണാന്‍ ഉതകുന്നതുമല്ല. പ്രാദേശിക സമ്പത്തുല്പാദനത്തിലും ഉപഭോഗത്തിലും ഊന്നിയ ഒരു വികസന സംസ്കാരം കേരളത്തിനുണ്ടാകണം.

മിക്ക സേവന മേഖലകളും മാഫിയകളുടെ പിടിയിലമരുന്നു. ഭക്ഷണം, ആരോഗ്യം, വിദ്യാഭ്യാസം, ഉല്ലാസ മാധ്യമങ്ങള്‍ തുടങ്ങി ഏതെടുത്താലും സ്ഥിതി വ്യത്യസ്തമല്ല. സര്‍ക്കാര്‍ വകുപ്പുകളാകട്ടെ അഴിമതിയുടെ കൂത്തരങ്ങാണു്. അഭ്യസ്ത വിദ്യരുടെ തൊഴിലില്ലായ്മ അതിന്റെ ഏറ്റവും ഉയര്‍ന്ന തോതിലാണു്. തൊഴിലില്ലാത്തവര്‍ പൊതുവെ 'കമ്മീഷന്‍ ഏജന്‍സി' വരുമാന മാര്‍ഗ്ഗമായി കാണുന്നു. ഇതു് ധന മൂലധന വിളയാട്ടത്തിനു് അനുകൂലമായ സാഹചര്യം സൃഷ്ടിച്ചിട്ടുണ്ടു്. കേരളത്തില്‍ ഇന്നു് ശാരീരികാദ്ധ്വാനം ആവശ്യമുള്ള തൊഴിലെടുക്കുന്നതു്, ഏറിയ കൂറും, മറ്റു് സംസ്ഥാനക്കാരാണു്.

ആരോഗ്യത്തിന്റെ അടിസ്ഥാനം ഭക്ഷണവും രോഗചികിത്സയും മാത്രമായി സമൂഹം തെറ്റിദ്ധരിച്ചിരിക്കുന്നു. ഒരു നല്ല ശതമാനം ജനങ്ങള്‍ പോഷകഗുണം കൂടിയ ചില ഭക്ഷണവിഭവങ്ങള്‍, പ്രത്യേകിച്ചു് മാംസവും മത്സ്യവും കൊഴുപ്പും അമിതമായി കഴിക്കുന്നു. ഗണ്യമായ മറ്റൊരു വിഭാഗം പട്ടിണിയിലും ദാരിദ്ര്യത്തിലും കഴിയുന്നു. ആരും തന്നെ അവശ്യ ജീവകങ്ങളും പോഷണങ്ങളും സമീകൃതമായി കഴിക്കുന്നില്ല. കൃത്രിമ ഭക്ഷ്യങ്ങളോടുള്ള ആസക്തി വര്‍ദ്ധിക്കുന്നു. പ്രകൃതി വിഭവങ്ങളോടുള്ള താല്പര്യം കുറഞ്ഞു് വരുന്നു. ചക്കയും മാങ്ങയും വാഴപ്പഴവും കരിക്കും തേങ്ങയും മറ്റിതര കായ് കനികളും അപ്രത്യക്ഷമാകുന്നു. ഇന്നുള്ളവ ഉപയോഗിക്കാതെ നശിക്കുന്നു. ഫല വൃക്ഷങ്ങള്‍ നശിപ്പിച്ചു് റബ്ബര്‍ പിടിപ്പിക്കുന്നു. പച്ചക്കറി കൃഷിയ്ക്കു് പകരം കൃത്രിമ കോഴി വളര്‍ത്തല്‍ വ്യാപകമാകുന്നു. പോരാത്തവ അന്യ സംസ്ഥാനങ്ങളില്‍ നിന്നു് കൊണ്ടു് വരുന്നു. തയ്യാറാക്കി മാസങ്ങളോളവും വര്‍ഷങ്ങളായും സൂക്ഷിക്കുന്ന കൃത്രിമ ഭക്ഷണങ്ങള്‍ കൂടുതലായി കഴിക്കുന്നു. ഭക്ഷണത്തിലെ മായം ചേര്‍ക്കല്‍ വ്യാപകമായിരിക്കുന്നു. അതു് മൂലവും രോഗം പെരുകുന്നു. ആരോഗ്യ പ്രശ്നങ്ങള്‍ ഗുരുതരമാകുന്നു.

ആരോഗ്യ രംഗത്തു് ലാഭം ഉയര്‍ത്താനായി സ്ഥാനത്തും അസ്ഥാനത്തും പരിശോധനകളും രാസ മരുന്നും പ്രയോഗിക്കപ്പെടുന്നു. ജീവിത ശൈലീ രോഗങ്ങളില്‍ നിന്നു് മുക്തി നേടാന്‍ ജീവിത ശൈലി ക്രമീകരിക്കാതെ രാസ മരുന്നു് പ്രയോഗം മാത്രം നടത്തുന്നതു് മൂലം രോഗം മാറാതെ നില നില്‍ക്കുന്നതിനിടയാക്കുന്നു. മരുന്നു് പ്രയോഗത്തിലൂടെ രോഗ ലക്ഷണം മാറി നില്കുന്നതേ ഉള്ളു. രോഗകാരണങ്ങളും രോഗങ്ങളും വഷളാകുന്നു. പുതിയ രോഗങ്ങള്‍ കൂടി സൃഷ്ടിക്കപ്പെടുന്നു. രോഗികള്‍ പെരുകുന്നു. രോഗാതുരത വര്‍ദ്ധിക്കുന്നു. ആധുനിക രാസ വൈദ്യത്തെ അനുകരിച്ചു് ആയൂര്‍വ്വേദവും ഹോമിയോപ്പതിയും സ്വയം അധപ്പതിക്കുന്നു.

നടന്നെത്താവുന്നിടത്തേയ്ക്കു് പോലും വാഹനങ്ങളില്‍ പോകുന്നു. വാഹന പെരുപ്പം റോഡുകളെ ശ്വാസം മുട്ടിക്കുന്നു. ഗതാഗതം മെല്ലെയാകുന്നു. സമയവും ഊര്‍ജ്ജവും വിഭവവും പാഴാക്കുന്നു. നടത്തമാണു് ഏറ്റവും നല്ല വ്യായാമമെന്നിരിക്കേ, നടത്തത്തിന്റെ അഭാവത്തില്‍ ശരിയായ വ്യായാമമില്ലാതെ സമൂഹം രോഗഗ്രസ്തമാകുന്നു. ആരോഗ്യ രംഗമാകട്ടെ മൂലധനാധിപത്യത്തിന്റെ പിടിയിലാണു്. അതിനെ ആശ്രയിച്ചുള്ള ആരോഗ്യ സംരക്ഷണം മൂലധനാശ്രിതത്വം അവസാനിപ്പിക്കാനുള്ള തൊഴിലാളിവര്‍ഗ്ഗത്തിന്റെ പരിശ്രമങ്ങള്‍ക്കു് വിലങ്ങുതടിയായി മാറുന്നു. പരിസ്ഥിതി സംരക്ഷണത്തിലും ഭക്ഷണത്തിലും അദ്ധ്വാനത്തിലും ഉല്ലാസത്തിലും വിശ്രമത്തിലും അധിഷ്ഠിതമായ, സാമൂഹ്യോത്മുഖമായ ആരോഗ്യ പരിരക്ഷാ സമ്പ്രദായം രൂപപ്പെടുത്തേണ്ടിയിരിക്കുന്നു.

വിദ്യാഭ്യാസ രംഗം വഷളാക്കപ്പെട്ടിരിക്കുന്നു. പൊതു വിദ്യാഭ്യാസം തകര്‍ക്കപ്പെട്ടിരിക്കുന്നു. വിദ്യാഭ്യാസ കച്ചവടം പൊടി പൊടിക്കുന്നു. കപട വിദ്യാലയങ്ങളും കോഴ്സുകളും വ്യാപകമാകുന്നു. അവയില്‍ പഠിപ്പിച്ചു് ചിന്താശൂന്യമായ തലമുറയെ സൃഷ്ടിക്കുന്നു. മാതൃഭാഷാ വിദ്യാഭ്യാസം തകകര്‍ക്കപ്പെട്ടിരിക്കുന്നു. ആശയ വിനിമയത്തോടൊപ്പം വിജ്ഞാന സ്വാംശീകരണത്തിന്റേയും സംഭരണത്തിന്റേയും മാത്രമല്ല, അമൂര്‍ത്ത ചിന്തയുടേയും മാധ്യമം കൂടിയാണു് ഭാഷ എന്ന കാര്യം തന്നെ സമൂഹം മറിന്നിരിക്കുന്നു. വിജ്ഞാന സ്വാംശീകരണം എളുപ്പത്തില്‍ സാധ്യമാകുന്നതു് മാതൃഭാഷയിലാണെന്ന അനുഭവ പാഠം നഷ്ടപ്പെട്ട തലമുറ മൂലധനാധിപത്യത്തിന്റെ ഇരകളായി മാറിയിരിക്കുന്നു. കണക്കിന്റെ യുക്തി പോലും ശരിയായി മനസിലാക്കുന്നതില്‍ നിന്നു് ഇംഗ്ലീഷ് മാധ്യമത്തിലുള്ള പഠനം മലയാളികളെ വിലക്കിയിരിക്കുന്നു. അതാകട്ടെ, നമ്മുടെ എഞ്ചിനിയറിങ്ങു് പഠനത്തിന്റേയും ശാസ്ത്ര പഠനത്തിന്റേയും ഗുണ മേന്മ ഇടിച്ചുകൊണ്ടിരിക്കുന്നു. തൊഴിലാളികളുടെ മക്കള്‍ അവരുടെ സംസ്കാരമല്ല സ്കൂളുകളില്‍ നിന്നാര്‍ജ്ജിക്കുന്നതു്. മുതലാളിത്തത്തിനു് എല്ലാക്കാലത്തും വിടുപണി ചെയ്യാനുള്ള കരുക്കള്‍ മാത്രമാണവിടെ നിന്നു് വിദ്യാര്‍ത്ഥികള്‍ക്കു് കിട്ടുന്നതു്. ഈ സ്ഥിതി മാറണം. ചുറ്റുപാടുകളില്‍ നിന്നും അനുഭവത്തിലൂടെ കുട്ടികളെ പഠിക്കാന്‍ പ്രോത്സാഹിപ്പിക്കുകയും സഹായിക്കുകയും ചെയ്യുന്ന തരത്തില്‍ വിദ്യാഭ്യാസവും പ്രായോഗികവും സാമൂഹ്യോത്മുഖമാക്കുന്നതിലൂടെയും മാത്രമേ കേരളത്തിനു് ഇനിയൊരടി മുന്നോട്ടു് പോകാനാവൂ.

പുതിയ ആശയം സൃഷ്ടിക്കാന്‍ മാതൃഭാഷയാണു് സഹായിക്കുക. പുതിയ ചിന്തകള്‍ക്കു് രൂപം നല്‍കാന്‍ കഴിയുന്നതു് സ്വാംശീകരിക്കപ്പെട്ട വിജ്ഞാനത്തിന്റെ അടിത്തറയിന്മേലാണു്. വിജ്ഞാന സ്വാംശീകരണം അതിന്റെ പരമാവധി നടക്കുന്നതു് മാതൃഭാഷയിലാണു്. കാരണം, മുമ്പു് സ്വാംശീകരിക്കപ്പെട്ട അറിവുകളുമായി ബന്ധിപ്പിച്ചാണു് പുതിയ അറിവുകള്‍ സംഭരിക്കപ്പെടുന്നതു്. അതായതു്, മാതൃഭാഷയിലാണു് കാര്യങ്ങള്‍ നന്നായി മനസിലാക്കാന്‍ കഴിയുന്നതു്. സമഗ്രമായ അറിവില്‍ നിന്നേ ശരിയായ പുതിയ ചിന്ത ഉരുത്തിരിയുകയുള്ളു. സമഗ്രമായ അറിവു് മാതൃഭാഷയില്‍ മാത്രമേ സാധ്യമാകൂ. അന്യ ഭാഷയിലുള്ള വിദ്യാഭ്യാസം ഭാഗിക ഫലമേ തരൂ. പുതിയ തലമുറയിലെ മലയാളികള്‍ ഏറെയും അത്തരത്തില്‍ അല്പ വിദ്യരായി മാറ്റപ്പെട്ടു് കഴിഞ്ഞിരിക്കുന്നു.

അന്യ ഭാഷാ വിദ്യാഭ്യാസത്തിനു് പ്രേരണയായതു് ഭരണ ഭാഷയും കോടതി ഭാഷയും ബോധന മാധ്യമവും ഇംഗ്ലീഷായതിനാലാണു്. ഭരണാധികാരികളുടെ വീഴ്ച ഇവിടെ പ്രകടമാണു്. സ്വാതന്ത്ര്യാനന്തരം, പുതുതായി ഉയര്‍ന്നു് വന്ന ഭരണവര്‍ഗ്ഗത്തിലേയ്ക്കു് ചേക്കേറാന്‍ കഴിഞ്ഞ മുറി ഇംഗ്ലീഷുകാരാണു് ഈ ദുസ്ഥിതിക്കു് കാരണം. അവരെ നയിക്കുന്നതു് വിദ്യാദരിദ്രരെ ഭരിക്കാനും അവരുടെ മേല്‍ ആധിപത്യം നിലനിര്‍ത്താനും തങ്ങള്‍ക്കറിയുന്ന മുറി ഇംഗ്ലീഷാണു് മലയാളത്തേക്കാള്‍ നല്ലതെന്ന വികലമായ സ്വാര്‍ത്ഥ താല്പര്യത്തിലൂന്നിയ കാഴ്ചപ്പാടാണു്. മാത്രമല്ല, കേരളത്തിലും രാജ്യത്തു് തന്നെയും തൊഴിലവസര സൃഷ്ടി ഗണ്യമായി കുറഞ്ഞിരിക്കുന്നു. തൊഴിലന്വേഷിച്ചു് നാടു് വിടാന്‍ നിര്‍ബ്ബന്ധിതരായിരിക്കുന്ന യുവതലമുറ എന്തിനു് മലയാളം പഠിക്കണമെന്ന കാര്യത്തില്‍ സംശയാലുക്കളാകുന്നതില്‍ അവരെ കുറ്റപ്പെടുത്തിയിട്ടു് കാര്യമില്ല.

ബ്രിട്ടീഷ് ഭരണകാലത്തു് പോലും ഭരണവും കോടതിയും വിദ്യാഭ്യാസവും മലയാളത്തില്‍ നടന്നിരുന്നു. യൂറോപ്യന്‍ മിഷണറിമാര്‍ ഇവിടെ വന്നു് പ്രേഷിത പ്രവര്‍ത്തനം നടത്തിയതു് പോലും മലയാളം പഠിച്ചായിരുന്നു. അവര്‍ മലയാളത്തിന്റെ വളര്‍ച്ചയ്ക്കു് വലിയ സംഭാവന നല്‍കുകയും ചെയ്തു. മലയാളത്തിനു് ആദ്യമായി നിഘണ്ഡു നിര്‍മ്മിച്ചു് നല്‍കിയതു് പോലും അവരാണു്. എന്നാല്‍, അവരുടെ നാടന്‍ പിന്മുറക്കാര്‍ ഇംഗ്ലീഷ് വിദ്യാഭ്യാസത്തിലേയ്ക്കു് കേരളത്തെ നയിക്കുന്നതിനു് കാരണക്കാരായി. അവരെ അനുകരികരിച്ചു് ഇതര മത-ജാതി-സമുദായ സംഘടനകളും ഇംഗ്ലീഷ് വിദ്യാഭ്യാസം പ്രോത്സാഹിപ്പിക്കുന്നു. ചിന്താ ദരിദ്രരായവരുടെ തലമുറയെ വാര്‍ത്തെടുക്കുന്നു. ഇതു് സാമ്രാജ്യത്വ സാംസ്കാരികാധിനിവേശത്തിന്റെ സുഗമ മാര്‍ഗ്ഗമായും മാറിയിരിക്കുന്നു. അതിനു് ദേശീയ-പ്രാദേശിക മൂലധനവും മത-ജാതി-സമുദായ സംഘടനകളും മാധ്യമങ്ങളും കൂട്ടു് നില്കുകയാണു്. ഒരു സമൂഹത്തിനു് അതിന്റെ ഭാഷ നഷ്ടമായാല്‍ ആ സമൂഹം രക്ഷപ്പെടില്ല എന്നാണു് ചൊല്ലു്. ഭാഷ നഷ്ടപ്പെട്ട സമൂഹങ്ങള്‍ക്കു് ധന മൂല ധനം നയിക്കുന്ന ആഗോള മുതലാളിത്ത സമൂഹത്തിന്റെ പിന്നാമ്പുറങ്ങളില്‍ പാര്‍ശ്വവല്‍ക്കരിക്കപ്പെട്ടു് കഴിയുക മാത്രമേ വഴിയുള്ളു. കാരണം, സ്വന്തം മാതൃ ഭാഷ ഉപയോഗിക്കുന്നവരോടൊപ്പമെത്താന്‍ ഒരിക്കലും അന്യ ഭാഷ ഉപയോഗിക്കുന്നവര്‍ക്കു് കഴിയില്ല തന്നെ.

ഭാഷ വളരുന്നതു് പ്രയോഗത്തിലൂടെയാണു്. പ്രയോഗത്തില്‍ പുറകോട്ടു് പോയതു് മൂലം മലയാളത്തിന്റെ (പ്രാദേശിക ഭാഷകളുടേയെല്ലാം സ്ഥിതിയിതാണു്) വികാസം തടയപ്പെട്ടു. ഇന്നതു് മുരടിച്ചു് നില്കുന്നു. ഇംഗ്ലീഷ് ഭാഷ ആധുനിക വിവര സങ്കേതങ്ങള്‍ ഉപയോഗിച്ചു് വികസിക്കുമ്പോള്‍ മലയാളം ഇക്കാര്യത്തില്‍ വളരെ പിന്നിലാണു്. എല്ലാക്കാലവും മലയാളത്തേയും മലയാളികളേയും പിന്നണിയില്‍ തളച്ചിടും വിധത്തില്‍ സ്വകാര്യ ഉടമസ്ഥതയിലുള്ള വിവര സാങ്കേതികാധിഷ്ഠിത വിജ്ഞാനോപകരണങ്ങളാണു് മലയാളികള്‍ പഠിക്കുന്നതും ഉപയോഗിക്കുന്നതും. മലയാളികള്‍ ഉപയോഗിക്കുന്ന വിവര-വിജ്ഞാന-വിനിമയ സങ്കേതങ്ങള്‍ പരിഷ്കരിക്കാനോ മെച്ചപ്പെടുത്താനോ വികസിപ്പിക്കാനോ മലയാളികള്‍ക്കാവുന്നില്ല. ഉപയോഗിക്കാനുള്ള ലൈസന്‍സ് മാത്രമാണു് സമൂഹത്തിനുള്ളതു്. ഉടമകളായ കമ്പനികള്‍ക്കു് മാത്രമേ അവ ചെയ്യാനാവൂ. ഇങ്ങിനെ പോയാല്‍, വിദേശികളായ സ്വകാര്യ കുത്തക കമ്പനികളുടെ ലാഭ സാധ്യത നോക്കിയുള്ള മുന്‍ഗണനയില്‍ മാത്രമേ മലയാളവും മലയാളികളും വളരുകയുള്ളു.

കലയും സാഹിത്യവും ഭൌതിക ജീവിതത്തിന്റെ പ്രതിഫലനങ്ങളാണു്. ഓരോ കാലത്തും സൃഷ്ടിക്കപ്പെടുന്ന കലാ സാഹിത്യ സൃഷ്ടികള്‍ അതതു് കാലഘട്ടത്തിലെ ഭൌതിക ജീവിതത്തേയും അതു് സാധ്യമാക്കുന്ന സാഹചര്യങ്ങളേയും പ്രതിഫലപ്പിക്കും. മേല്പറഞ്ഞ ഭൌതിക ജീവിത സാഹചര്യങ്ങള്‍ നന്നായി തന്നെ പ്രതിഫലിക്കുന്നതാണു് നിലവിലുള്ള കലയും സാഹിത്യവുമെല്ലാം. യഥാര്‍ത്ഥ ഭൌതിക സാഹചര്യങ്ങള്‍ക്കുപരി ആ സാഹചര്യം സൃഷ്ടിക്കുന്ന ധന മൂലധനത്തിന്റെ താല്പര്യം സംരക്ഷിക്കുന്നതിനാണു് ധന മൂലധന ശക്തികള്‍ നിയന്ത്രിക്കുന്ന അച്ചടി-ദൃശ്യ-സ്രാവ്യ മാധ്യമങ്ങള്‍ ശ്രമിക്കുന്നതു്. വിവര വിനിമയ സാങ്കേതിക വിദ്യയുടെ വികാസം ദൃശ്യ-സ്രാവ്യ മാധ്യമങ്ങളുടെ പങ്കു് വര്‍ദ്ധിപ്പിച്ചിരിക്കുന്നു. അവ വെറും വാര്‍ത്താ മാധ്യമങ്ങളല്ല, ഇന്നറിയപ്പെടുന്നതു് പോലെ ഉല്ലാസ മാധ്യമങ്ങള്‍ മാത്രവുമല്ല, മറിച്ചു്, സമൂഹവുമായി ഇഴുകിച്ചേര്‍ന്നു് സമൂഹ ജീവിതത്തെ നിര്‍ണ്ണായകമായി സ്വാധീനിക്കാനും മാറ്റിത്തീര്‍ക്കാനും കഴിയുന്ന സാംസ്കാരിക മാധ്യമങ്ങളാണു്. നിലവില്‍ നമ്മുടെ ദൃശ്യ സ്രാവ്യ മാധ്യമങ്ങള്‍ നിര്‍വ്വഹിക്കുന്ന ധര്‍മ്മം ആഗോള ധന മൂലധന താല്പര്യാര്‍ത്ഥം സാമ്രാജ്യത്വ സംസ്കാരം ലോകമാകെ വ്യാപിപ്പിക്കുക എന്നതാണു്. എല്ലാ തിന്മകളേയും എതിര്‍ക്കുന്നു എന്ന പ്രതീതി സൃഷ്ടിക്കുമ്പോള്‍ തന്നെ, അവ മൂലധനാധിപത്യം സംരക്ഷിക്കാനായി പ്രത്യേക ശ്രദ്ധ കാണിക്കുന്നു. അതിന്റെ ഭാഗമായി ആഗോള ധന മൂല ധന താല്പര്യം നടപ്പാക്കുന്നതിനാവശ്യമായ സാംസ്കാരിക പരിതോവസ്ഥ സൃഷ്ടിക്കുകയും ചെയ്യുന്നു.

ശാസ്ത്ര സാങ്കേതിക വികാസം വളരെയേറെ നേടിയ ഇക്കാലത്തും ശാസ്ത്രീയ കാഴ്ചപ്പാടോ സാങ്കേതിക വിദ്യയുടെ ശരിയായ പ്രയോഗമോ സമൂഹം സ്വാംശീകരിച്ചിട്ടില്ല. എന്താണു് ശാസ്ത്രീയമെന്നതു് പലപ്പോഴും കാണാതെ പോകുന്നു. യാഥാര്‍ത്ഥ്യവുമായി പൊരുത്തപ്പെടുന്നതാണു് ശാസ്ത്രീയം. അതിനു് പകരം, പൊതുവെ, കൃത്രിമമായി ഉണ്ടാക്കപ്പെടുന്നവയെല്ലാം ശാസ്ത്രീയമായതാണെന്നു് സമൂഹത്തെ തെറ്റിദ്ധരിപ്പിച്ചു് ലാഭം നേടാന്‍ ധന മൂല ധനാധിപത്യത്തിനു് കഴിയുന്നു. അത്തരത്തിലാണു് സമ്പദ്ഘടനയും ആഹാര രീതികളും വിദ്യാഭ്യാസവും ആരോഗ്യ പരിചരണവും പരിസ്ഥിതിബോധവും സംസ്കാരവും മറ്റും ധന മൂലധന താല്പര്യത്തില്‍ വികലമാക്കപ്പെടുന്നതു്.

കായിക രംഗം സമൂഹത്തിന്റെ ആരോഗ്യ പരിചരണവുമായി നേരിട്ടു് ബന്ധപ്പെട്ട കാര്യമാണു്. പക്ഷെ, അതിന്നു് വെറും ധന മൂലധന വിളയാട്ടത്തിന്റെ വേദിയായി മാത്രമാണു് കരുതപ്പെടുന്നതു്. ക്രിക്കറ്റു് പോലുള്ള ചില കളികള്‍ക്കു് അമിത പ്രാധാന്യവും വിജയികള്‍ക്കു് വമ്പിച്ച സമ്മാനങ്ങളും മറ്റുമായി ഏതാനും ചിലര്‍ പങ്കെടുക്കുകയും മറ്റുള്ളവരെല്ലാം കാഴ്ചക്കാരായി മാറുകയും ചെയ്യുന്ന അവസ്ഥയാണിന്നുള്ളതു്. കായിക പ്രകടനങ്ങള്‍ കാണുന്നതു് കൊണ്ടു് ആരുടേയും ആരോഗ്യം മെച്ചപ്പെടില്ല. കായിക പ്രക്രിയകളില്‍ ഏര്‍പ്പെടുക എന്നതാണു് വേണ്ടതു്. അതില്‍ മികവിനു് വേണ്ടിയുള്ള മത്സരങ്ങളാണു് അഭികാമ്യം. മൊത്തം സമൂഹത്തിന്റേയും പങ്കാളിത്തമാണു് ഉണ്ടാകേണ്ടതു്.

സ്ത്രീ പീഢനവും പ്രായപൂര്‍ത്തിയാകാത്ത കുട്ടികള്‍ക്കെതിരെ വരെ ലൈംഗികാതിക്രമവും പെരുകി വരുന്നു. ഇതു് പൊതുവെ സാംസ്കാരികാധപതനത്തിന്റെ നേര്‍ ലക്ഷണമാണു്. മാത്രമല്ല, അതു് പണാധിപത്യ സമൂഹത്തിന്റെ സ്വഭാവവുമാണു്. കേരളത്തേ സംബന്ധിച്ചിടത്തോളം വലതു് പക്ഷ രാഷ്ട്രീയത്തിന്റെ അപചയത്തിന്റെ ഭാഗവുമാണതു്. സര്‍ക്കാരും രാഷ്ട്രീയ നേതൃത്വവും നീതി ന്യായ വ്യവസ്ഥയും ഇതിനുത്തരവാദികളാണു്. ആദ്യമായി കേരളത്തില്‍ കോളിളക്കം സൃഷ്ടിച്ച സൂര്യ നെല്ലി കേസ് കൈകാര്യം ചെയ്ത രീതിയും അതിന്റെ പരിണിതിയും കേരളത്തില്‍ തുടര്‍ന്നുണ്ടായ ബാലികാ പീഢനങ്ങളുടെ വേലിയേറ്റത്തിനു് വഴിവെച്ചു. സൂര്യ നെല്ലി കേസില്‍ ആരോപണ വിധേയരായ ഉന്നത കോണ്‍ഗ്രസ് നേതാക്കളും അവരെ നിയമത്തിന്റെ മാര്‍ഗ്ഗത്തിലൂടെ കുറ്റക്കാരല്ലെന്നു് തെളിയിക്കാനുള്ള അവസരം ഉപയോഗിക്കാതെ നിയമത്തിനു് വിധേയരാകാതെ രക്ഷിക്കാനായി നിയമ പാലകരും നീതിന്യായ വ്യവസ്ഥയും ആ കേസിനെ വളച്ചൊടിച്ചതും അത്തരം കേസുകള്‍ വര്‍ദ്ധിക്കാനിടയായിട്ടുണ്ടു്. തുടര്‍ന്നു് വന്ന കേസുകളിലും രാഷ്ട്രീയ പ്രവര്‍ത്തകരുടെ പങ്കു് വ്യക്തമാണു്. കേസു് തേച്ചു് മാച്ചു് കളയുന്നതില്‍ അവര്‍ വിജയിക്കുന്നു. സൂര്യ നെല്ലി കേസില്‍ കേരള ഹൈക്കോടതിയുടെ ആദ്യ വിധി ന്യായം ഒരു പരിഷ്കൃത സമൂഹത്തിനു് നേരെയുള്ള വെല്ലുവിളിയായി ഇന്നും നിലനില്കുന്നു. സൂര്യ നെല്ലി പെണ്‍കുട്ടി സ്വയം ഇറങ്ങി പുറപ്പെട്ടതു് കൊണ്ടാണു് അത്തരത്തില്‍ സംഭവിച്ചതെന്നും അതിനാല്‍ ആ കുട്ടിയെ പീഢനപ്പിച്ച 42 കശ്മലന്മാരും കുറ്റക്കാരല്ലെന്നുമുള്ള കണ്ടെത്തലാണു് വിധിന്യായത്തിലുള്ളതു്. പെണ്‍കുട്ടി സ്വമേധയാ ഇറങ്ങി പുറപ്പെട്ടാല്‍ 42 പേര്‍ക്കു് ആ കുട്ടിയെ പീഢിപ്പിക്കാനുള്ള അവകാശം ഏതു് നിയമ വകുപ്പു് പ്രകാരമാണു് ലഭിക്കുന്നതെന്നു് വിധി ന്യായം എങ്ങും പറഞ്ഞു് കണ്ടില്ല. ഇന്ത്യന്‍ ജനാധിപത്യത്തിന്റെ ശ്രീകോവിലെന്നു് വിശേഷിപ്പിക്കപ്പെടുന്ന രാജ്യ സഭയുടെ ഉപാദ്ധ്യക്ഷ സ്ഥാനം വഹിച്ചിരുന്ന ഉന്നത കോണ്‍ഗ്രസ് നേതാവടക്കം കുറ്റാരോപിതനായ ആ കേസിലെ പ്രതികളാരും ശിക്ഷിക്കപ്പെടാതെ പോയതിന്റെ അനന്തര ഫലമാണു് ഇന്നു് കേരളത്തില്‍ പെരുകി വരുന്ന സ്ത്രീപീഢനവും ബാലികാ പീഢനവും. അതാകട്ടെ വര്‍ഗ്ഗാധിപത്യം നിലനിര്‍ത്താനായി ബഹുജനങ്ങളെ അടിച്ചമര്‍ത്തുന്നതിന്റെ ഒരു പ്രധാനപ്പെട്ട മാര്‍ഗ്ഗമായി പരിണമിച്ചിരിക്കുന്നു. കേരളം പിന്നോട്ടു് പോകുന്നതിന്റെ പ്രധാന കാരണങ്ങളിലൊന്നു് അതു് പ്രദര്‍ശിപ്പിക്കുന്ന ഈ സ്ത്രീ വിരുദ്ധതയാണു്.

കേരളത്തെപ്പോലെ വിദ്യാഭ്യാസവ്യാപനത്തിലും സമ്പത്തിന്റെ വിതരണത്തിലും അതിലൂടെ ജീവിത ഗുണപരതയിലും നേട്ടം കൈവരിച്ച പ്രദേശത്തു് ഇന്നും അമ്പതു് ശതമാനത്തിലധികം വരുന്ന സമൂഹത്തിലെ അംഗങ്ങള്‍ സ്ത്രീകളാണെന്ന പേരില്‍ അടിമത്തം പേറുന്നതിനു് യാതൊരു നീതീകരണവുമില്ല. ഏറ്റവും സുരക്ഷിതമാകേണ്ട കുടുംബത്തിനുള്ളില്‍ സ്വന്തം മാതാപിതാക്കളില്‍ നിന്നു് തന്നെ ലൈംഗിക പീഠനം ഏറ്റു് വാങ്ങി ദുരിതം പേറുന്ന പിഞ്ചു് ബാല്യങ്ങളുടെ എണ്ണം വര്‍ദ്ധിക്കുകയാണോ കുറയുകയാണോ എന്നതു് പഠനാര്‍ഹമാണു്. സ്ത്രീ പീഠകര്‍ക്കു് രാഷ്ട്രീയാതിര്‍വരമ്പുകളൊന്നുമില്ല. അതിനു് ഇടതു് പക്ഷമെന്നോ വലതു് പക്ഷമെന്നോ വ്യത്യാസവുമില്ല. പുരുഷാധിപത്യം എല്ലായിടത്തും അരങ്ങു് വാഴുകയാണു്. കേരളത്തിനു് ഈ പ്രാകൃതാവസ്ഥ താങ്ങാനാവില്ല. സ്ത്രീകളുടെ സ്വാതന്ത്ര്യം കേരള സമൂഹത്തിന്റെ മുന്നേറ്റത്തിന്റെ അടിയന്തിരോപാധിയായി മാറിയിരിക്കുന്നു. സ്ത്രീകളുടേയും കുട്ടികളുടേയും സ്വയം സംരക്ഷണമാര്‍ഗ്ഗങ്ങള്‍ വ്യാപകമാക്കിയും അവരുടെ സംരക്ഷണത്തിനായി ചൂഷണം അവസാനിപ്പിക്കാനാഗ്രഹിക്കുന്ന ജനങ്ങളൊന്നാകെ രംഗത്തിറങ്ങിയും മാത്രമേ ഈ വിപത്തു് തടയാനാവൂ. പകുതിയിലേറെ വരുന്ന സ്ത്രീകളേയും ഭാവി സമൂഹത്തെ മുന്നോട്ടു് നയിക്കേണ്ട കുഞ്ഞുങ്ങളേയും അടിച്ചമര്‍ത്തിയും ഒരു സമൂഹത്തിനു് പുരോഗമിക്കാനാവില്ല തന്നെ.

ചുരുക്കത്തില്‍, കേരളത്തിനു് ഇങ്ങിനെ തുടരാനാവില്ല.

അപാര്‍ടു്മെന്റു് ഉടമകളുടെ നിയമപരമായ അവകാശം സംരക്ഷിക്കാന്‍ കേരള സര്‍ക്കാര്‍ അടിയന്തിരമായി ഇടപെടുക - 1983 ലെ അപാര്‍ടു് മെന്റു് ഓണര്‍ഷിപ്പു് ആക്ടു് പ്രകാരം അപാര്‍ടു്മെന്റുടകളുടെ രേഖകള്‍ രജിസ്റ്റര്‍ ചെയ്യാന്‍ സബ് രജിസ്ട്രാര്‍മാര്‍ക്കു് നിര്‍ദ്ദേശം നല്‍കുക

കേരളത്തിന്റെ പാര്‍പ്പിടാവശ്യവും സ്ഥലപരിമിതിയും ജനസാന്ദ്രതയും കണക്കിലെടുത്തു് ബഹുനില കെട്ടിടങ്ങളിലെ അപാര്‍ടു് മെന്റുകള്‍ പ്രോത്സാഹിപ്പിക്കുന്നതിനു് വേണ്ടി അപാര്‍ടു്മെന്റു് ഒരു ആസ്തി ഖണ്ഡമായി കണക്കാക്കി അവയുടെ കൈമാറ്റവും പിന്തുടര്‍ച്ചാവകാശവും ഉറപ്പാക്കുക എന്ന ലക്ഷ്യം വെച്ചു് നിയമ പുസ്തകത്തില്‍ ഒരു നിയമം എഴുതി ചേര്‍ത്തിട്ടുണ്ടു്. കേരള അപാര്‍ടു്മെന്റു് ഓണര്‍ഷിപ്പു് ആക്ടു് 1983. അപാര്‍ടു്മെന്റിനോടൊപ്പം അതിന്റെ പൊതു ഇടങ്ങളുടെ ഓഹരിയും ഓരോ ഉടമയ്ക്കും കൈമാറ്റം ചെയ്യപ്പെടുന്നു. എന്നാല്‍, ആ ഓഹരികള്‍ കൂട്ടിച്ചേര്‍ത്തു് ഉടമകളുടെ കൂട്ടായ്മ കേരളത്തില്‍ നിലവിലില്ല. പകരം, ധര്‍മ്മ സ്ഥാപനം രജിസ്റ്ററാക്കല്‍ നിയമപ്രകാരമുള്ള കൂട്ടായ്മ സൃഷ്ടിച്ചു് അവയെക്കൊണ്ടു് മെയിന്റനന്‍സും സേവനങ്ങളും നല്‍കിപ്പിച്ചു് പൊതു ആസ്തികളുടെ ഉടമാവകാശം ബിര്‍ഡര്‍മാര്‍ സ്വന്തം കമ്പനിയില്‍ നിലനിര്‍ത്തുകയാണു്. ഓഹരി കൊണ്ടു് ഉടമാവകാശമോ നിയന്ത്രമണോ ഭരണാവകാശമോ ഉടമകള്‍ക്കു് ലഭിക്കുന്നില്ല. അതിനു് ഉടമകളുടെ അസോസിയേഷന്‍ തന്നെ വേണം. ധര്‍മ്മ സ്ഥാപനം മതിയാകില്ല. അതാണു് 1983 ആക്ടു് ഉറപ്പാക്കുന്നതു്. പക്ഷെ, കേരളത്തില്‍ അതു് ഒരിടത്തും നടപ്പാക്കപ്പെട്ടിട്ടില്ല.

കേരളത്തിന്റെ ജനാധിപത്യ വികാസ നിലവാരത്തിനു് നേരെ കൊഞ്ഞനം കുത്തുന്ന ഒന്നാണു് നാളിതു് വരെ നടപ്പാക്കപ്പെടാത്ത ഈ നിയമം. മഹാരാഷ്ട്രയിലെ നിയമത്തിന്റെ പകര്‍പ്പാണിതു്. അവിടെ അതു് ഏറിയും കുറഞ്ഞും നടപ്പാക്കപ്പെടുന്നു. ഇവിടെ ഉദ്യോഗസ്ഥരും ബില്‍ഡര്‍മാരും ചേര്‍ന്നുള്ള കള്ളക്കളിയിലൂടെ ഈ നിയമം നടപ്പാക്കപ്പെടാതെ അപാര്‍ടു്മെന്റു് വാങ്ങുന്ന മുഴുവന്‍ ഉടമകളും കബളിപ്പിക്കപ്പെടുന്നു.

അപാര്‍ടു്മെന്റിരിക്കുന്ന കെട്ടിടത്തിലെ വില്കപ്പെടുന്ന അപാര്‍ടു്മെന്റുകളൊഴിച്ചുള്ള കെട്ടിടത്തിന്റെ പൊതു ഭാഗങ്ങളും അതിരിക്കുന്ന സ്ഥലവും മറ്റു് അനുബന്ധ സൌകര്യങ്ങളും ഈ നിയമം നടപ്പാക്കപ്പെട്ടാല്‍ വാങ്ങുന്നവരുടെ ജനാധിപത്യ കൂട്ടായ്മയുടെ ഉടമസ്ഥതയിലാകും. അതില്ലെങ്കില്‍ അവ ബില്‍ഡറുടേയോ പ്രൊമോട്ടറുടേയോ പേരില്‍ നിലകൊള്ളും. ഭാവിയില്‍ അവ പുനര്‍ നിര്‍മ്മിക്കേണ്ടി വരുമ്പോഴായിരിക്കും ഉടമകള്‍ കബളിപ്പിക്കപ്പെടുക. പഴയ ബില്‍ഡറല്ലാതെ മറ്റാര്‍ക്കും അതു് പുനര്‍നിര്‍മ്മിക്കാനാവില്ല. ഇന്നു് സ്ഥാപിക്കപ്പെട്ടിരിക്കുന്ന ജനാധിപത്യ കൂട്ടായ്മകളെല്ലാം ദൈനന്തിന നടത്തിപ്പിനും ക്ഷേമസൌകര്യങ്ങള്‍ ഒരുക്കുന്നതിനും മാത്രം അധികാരമുള്ള ധര്‍മ്മ സ്ഥാപനങ്ങളായാണു് പ്രവര്‍ത്തിപ്പിക്കപ്പെടുന്നതു്. മേല്‍ ആക്ടിന്റെ പരിധിയിലായാല്‍ അത്തരം കൂട്ടായ്മകള്‍ക്കു് സ്വത്തു് കൈകാര്യ ചെയ്യാനും ലാഭം ഉണ്ടെങ്കില്‍ അതു് വീതിക്കാനും അവകാശാധികാരങ്ങളുള്ളപ്പോള്‍ ചാരിറ്റബില്‍ ട്രസ്റ്റു് ആക്ടനുസരിച്ചു് നിലവിലുള്ള കൂട്ടായ്മകള്‍ക്കു് അതിനു് അനുവാദമില്ല. അവ സമൂഹത്തിന്റെ ട്രസ്റ്റി എന്ന നിലയില്‍ മിച്ചം സമൂഹത്തിനു് വേണ്ടി ചെലവാക്കാന്‍ ബാധ്യതപ്പെട്ടിരിക്കുന്നു. ഇതൊന്നുമറിയാതെ തങ്ങള്‍ക്കു് പൂര്‍ണ്ണ അധികാരാവകാശങ്ങളുണ്ടെന്ന മിഥ്യാ ബോധം വെച്ചു് പുലര്‍ത്തുന്നവരാണു് ഇന്നു് കേരളത്തിലെ അപാര്‍ടു്മെന്റു് ഉടമകളും അവരുടെ കൂട്ടായ്മകളും. 

ആക്ടിന്റെ പ്രധാന വകുപ്പുകള്‍
==1983 ആക്ടു്  പ്രകാരം അപാര്‍ടു് മെന്റു് ഉടമകളുടെ കൂട്ടായ്മ സൊസൈറ്റിയായോ സഹകരണ സംഘമായോ കമ്പനിയായോ രജിസ്റ്റര്‍ ചെയ്യാവുന്നതാണു്.
== കൂട്ടായ്മയുടെ രൂപമേതായാലും, അതിനു് വേണ്ടതു് മുഴുവന്‍ ഉടമകളും ഈ ആക്ടിന്റെ പരിധിയില്‍ വരാന്‍ സമ്മതമാണെന്നു് പ്രഖ്യാപിക്കുന്ന ആധാരം സബ് രജിസ്ട്രാര്‍ ഓഫീസില്‍ രജിസ്റ്റര്‍ ചെയ്യുക എന്നതാണു്.
== ആര്‍ക്കും ഈ കൂട്ടായ്മയില്‍ നിന്നു് ഒഴിഞ്ഞു് നില്കാനാവില്ല. കാരണം, അപാര്‍ടു്മെന്റു് വാങ്ങുന്നതിലൂടെ അത്തരം ഒരു കൂട്ടായ്മയില്‍ അവര്‍ സ്വയം ചേരുകയാണു് ചെയ്യുന്നതു്.
== സമ്മത പ്രഖ്യാപനാധാരം (ഫോറം എ) രജിസ്റ്റര്‍ ചെയ്യാനുള്ള അധികാരം സബ് രജിസ്ട്രാര്‍മാര്‍ക്കാണു് നിയമം നല്‍കിയിരിക്കുന്നതു്. അതിനാവശ്യമായ എല്ലാ രജിസ്റ്ററുകളും ഫോമുകളും ആക്ടിന്റെ അനുബന്ധമായി നിലവില്‍ വന്നിരിക്കുന്ന കേരള അപാര്‍ടു്മെന്റു് ഓണര്‍ഷിപ്പു് ചട്ടം 1994 ല്‍ പറഞ്ഞിട്ടുണ്ടു്. (പക്ഷെ, സബ് രജിസ്ട്രാര്‍മാര്‍ രജിസ്റ്റര്‍ ഇല്ലെന്ന കാരണം പറഞ്ഞു് അവ രജിസ്റ്റര്‍ ചെയ്യാന്‍ തയ്യാറാകുന്നില്ല.)
== ബില്‍ഡറോ പ്രൊമോട്ടറോ ഈ ആധാരങ്ങള്‍ രജിസ്റ്റര്‍ ചെയ്താല്‍ ഒറ്റ രജിസ്ട്രേഷന്‍ മതി. അവരതു് ചെയ്യുന്നില്ലെങ്കില്‍ വാങ്ങി ഉടമാവകാശം നേടിയ ഓരോ ഉടമയും അതു് രജിസ്റ്റര്‍ ചെയ്യണമെന്നാണു് നിയമം അനുശാസിക്കുന്നതു്. (മൊത്തം ഉടമയോ - Sole Owner അല്ലെങ്കില്‍ എല്ലാ ഉടമകളും - All Owners എന്നതാണു് പദപ്രയോഗം).
== ഫോറം എ (സമ്മത പ്രഖ്യാപനാധാരം) രജിസ്റ്റര്‍ ചെയ്തു് കഴിഞ്ഞാല്‍ ആ വിവരം അതിന്റെ വിശദാംശങ്ങളോടെ അംഗീകരിക്കപ്പെട്ട അധികാരി മുമ്പാകെ സമര്‍പ്പിക്കണം. എറണാകുളത്തു് അതു് ഡെപ്യൂട്ടി കളക്ടര്‍ (ഡിസാസ്റ്റര്‍ മാനേജ്മെന്റു്) ആണു്.
== അതു് രജിസ്റ്റര്‍ ചെയ്തതിന്റേയും ബന്ധപ്പെട്ട അധികാരിക്കു് സമര്‍പ്പിച്ചതിന്റേയും വിവരങ്ങളടങ്ങുന്നതാണു് അപാര്‍ടു്മെന്റു് സമര്‍പ്പിക്കുന്ന ആധാരം (ഫോറം ബി). അതു് വീണ്ടും സബ് രജിസ്ട്രാര്‍ മുമ്പാകെ രജിസ്റ്റര്‍ ചെയ്യണം.
== അതേ സമയം തന്നെ ആക്ടില്‍ പറയുന്ന വ്യവസ്ഥകള്‍ ഉള്‍ക്കൊള്ളിച്ചു് അസോസിയേഷന്റെ നിയമാവലി തയ്യാറാക്കി അതും രജിസ്റ്റര്‍ ചെയ്യണം. (ഈ സംഘം ഒരു നിര്‍ബ്ബന്ധിത കൂട്ടായ്മയാണു്. ജനാധിപത്യപരമായി പ്രവര്‍ത്തിപ്പിക്കപ്പെടുന്നതിനുള്ള വ്യവസ്ഥകളാണുള്ളതു്. കൂട്ടായ ആവാസ കേന്ദ്രങ്ങളും കൂട്ടായ അടുക്കളകളും കൂട്ടായ കൃഷിസ്ഥലങ്ങളടക്കം ഉല്പാദന കേന്ദ്രങ്ങളും അടങ്ങുന്ന ഭാവി സമൂഹ ജീവിതത്തിന്റെ പ്രാഗ് രൂപമായി ഇതിനെ കാണാം. വ്യക്തി സ്വാതന്ത്ര്യത്തിന്റേയും സ്ത്രീ സ്വാതന്ത്ര്യത്തിന്റേയും ഉപാധി അടുക്കളയില്‍ നിന്നുള്ള വ്യക്തികളുടെ സ്വാതന്ത്രമാണെന്നതിനാല്‍ അതിനുള്ള സാധ്യതകളെല്ലാം ഈ സാമൂഹ്യ ജിവിതം ഉറപ്പാക്കുന്ന നിര്‍ബ്ബന്ധിത കൂട്ടായ്മയില്‍ ദര്‍ശിക്കാം)
== അതോടെ പൊതു ഇടങ്ങളും സ്ഥലവും അടക്കം പൊതു ആസ്തികളെല്ലാം ബില്‍ഡറുടേയോ പ്രൊമോട്ടറുടേയോ കൈകളില്‍ നിന്നു് ഉടമകളുടെ കൂട്ടായ്മയുടെ കൈവശമാകും.

പക്ഷെ ഈ നിയമം കേരളത്തില്‍ നടപ്പാക്കപ്പെടാതെ നോക്കാന്‍ നിക്ഷിപ്ത താല്പര്യക്കാര്‍ക്കു് ഇതേ വരെ കഴിഞ്ഞു എന്നതാണു് ആശ്ചര്യകരമായിരിക്കുന്നതു്. അഴിമതിക്കാരായ രാഷ്ട്രീയക്കാരും ഉദ്യോഗസ്ഥ മേധാവികളും ബില്‍ഡര്‍മാരും ചേര്‍ന്നു് അതു് നാളിതു് വരെ സാധിച്ചിരിക്കുന്നു.

ഈ നിയമം നടപ്പാക്കിയെടുക്കാനുള്ള പരിശ്രമത്തിലാണു് വൈറ്റിലയിലുള്ള മിസ്റ്റിക് ഹൈറ്റ്സ് 3 എന്ന അപാര്‍ടു്മെന്റു് സമുച്ചയത്തിലെ ഉടമകള്‍ ഏര്‍പ്പെട്ടിട്ടുള്ളതു്.

നിര്‍ദ്ദിഷ്ട അധികാരിയായ ഡെപ്യൂട്ടി കളക്ടര്‍ ഉടമകളുടെ അപേക്ഷ അംഗീകരിച്ചു് ബന്ധപ്പെട്ട രേഖകളും അസോസിയേഷനും രജിസ്റ്റര്‍ ചെയ്യാനുള്ള ഉത്തരവു് നല്‍കി കഴിഞ്ഞു.

സബ് രജിസ്ട്രാര്‍ തൃപ്പൂണിത്തുറ ഇതിനുള്ള നടപടിക്രമം ആവശ്യപ്പെട്ടു് മേലധികാരിക്കു് ഉടമ നല്‍കിയ അപേക്ഷ  കൈമാറിയിരിക്കുകയാണു്.

രജിസ്ട്രേഷന്‍ നടത്താനുള്ള നിര്‍ദ്ദേശം ബഹുമാനപ്പെട്ട കേരള ഹൈക്കോടതിയില്‍ നിന്നും ഉടമകള്‍ക്കു് കിട്ടിക്കഴിഞ്ഞിരിക്കുന്നു.  ഫോറം എ യോടൊപ്പം സമര്‍പ്പിക്കേണ്ട രേഖ അംഗീകൃത സൈറ്റു് പ്ലാനും ബില്‍ഡിങ്ങു് പ്ലാനുമാണു്. അതനുസരിച്ചുള്ള പൊതു ആസ്തികളുടെ വിവരങ്ങളാണു് നല്‍കേണ്ടതു്. എന്നാല്‍ അംഗീകൃത പ്ലാനില്‍ നിന്നു് വ്യതിചലിച്ചു് പലതും കാട്ടിക്കൂട്ടി അതെല്ലാം തങ്ങളുടേതാണെന്നു് വരുത്തി ഉടമകള്‍ നല്‍കുന്ന വിവരം ശരിയല്ലെന്നു് വാദിക്കാനാണു് ബില്‍ഡറുടെ ശ്രമം. ഇത്തരം നിയമ ലംഘനങ്ങള്‍ കൈക്കൂലി കൊടുത്തു് ഒതുക്കുകയാണു് ബില്‍ഡര്‍മാര്‍ ചെയ്യുന്നതു്. അതു് പ്രകാരം വരുന്ന മാറ്റങ്ങളുടെ പേരില്‍ ഉടമകള്‍ നല്‍കുന്ന വിവരങ്ങള്‍ തെറ്റാണെന്നു് വാദിച്ചു് ജയിക്കാമെന്നാണു് ബില്‍ഡറുടെ ധാരണ. നിയമ ലംഘനങ്ങള്‍ സ്വന്തം കെട്ടിടത്തിലാണെങ്കില്‍ അതയാളെ മാത്രം ബാധിക്കുന്ന പ്രശ്നമാണു്. പക്ഷെ, പണം മുടക്കി അപാര്‍ടു്മെന്റു് വാങ്ങുന്നവര്‍ക്കു് വേണ്ടി കരാര്‍ പ്രകാരം ബില്‍ഡര്‍മാര്‍ നടത്തുന്ന നിര്‍മ്മാണത്തിലെ നിയമ ലംഘനം ഒരു കാരണവശാലും ബില്‍ഡര്‍മാരുടെ രക്ഷയ്ക്കെത്തില്ല. നിയമത്തിന്റെ പിടിയില്‍ അവര്‍ പെടുക തന്നെ ചെയ്യണം. അതേ സമയം ഉടമകള്‍ക്കു് കരാര്‍ പ്രകാരമുള്ള, അംഗീകൃത പ്ലാനുകള്‍ പ്രകാരമുള്ള ആസ്തികളും സൌകര്യങ്ങളും ലഭിക്കുകയും ചെയ്യണം. ഇത്തരം നിയമ ലംഘനങ്ങള്‍ക്കും വഞ്ചനയ്ക്കും തട്ടിപ്പിനുമുള്ള ശിക്ഷ ബില്‍ഡര്‍മാരെ കാത്തിരിക്കുന്നു.

ആയിരക്കണക്കിനു് ബില്‍‍ഡര്‍മാര്‍ക്കു് വേണ്ടി ലക്ഷക്കണക്കിനു് ഉടമകളെ വഞ്ചിക്കുകയാണു് കേരളത്തിലെ ഭരണകൂടവും ഉദ്യോഗസ്ഥരും ബില്‍ഡര്‍മാരും ചേര്‍ന്നു് ചെയ്യുന്നതു്. ഇതിനൊരറുതി വരുത്തുന്ന വളരെ നിര്‍ണ്ണായകവും ദൂരവ്യാപക ഫലങ്ങളുമുളവാക്കുന്ന ഒരു സമര രംഗത്താണു് വൈറ്റില മിസ്റ്റിക് ഹൈറ്റ്സ് 3 ലെ ഉടമകള്‍.

കേരളത്തിലെ ഇടതു് പക്ഷ ജനാധിപത്യ മുന്നണി സര്‍ക്കാരിന്റേയും അതിനു് നേതൃത്വം നല്‍കുന്ന സിപിഐ(എം) ന്റേയും രജിസ്ട്രേഷന്‍ വകുപ്പു് മന്ത്രിയുടേയും മുഖ്യമന്ത്രിയുടേയും അടിയന്തിര ശ്രദ്ധ അര്‍ഹിക്കുന്ന വിഷയമാണിതു്. പ്രവാസികളടക്കം ലക്ഷക്കണക്കായ അപാര്‍ടു് മെന്റു് ഉടമകള്‍ക്കും അവരുടെ കുടുംബാംഗങ്ങള്‍ക്കും ആശ്വാസം പകരുന്ന തീരുമാനവും നടപടികളും ഈ സര്‍ക്കാരില്‍ നിന്നു് അവര്‍ പ്രതീക്ഷിക്കുന്നു.

ടെലികോം സേവനങ്ങള്‍ സാമൂഹ്യ ഉടമസ്ഥതയിലാകണം

ആര്‍ക്കും ആരോടും എവിടെനിന്നും അതിരുകളില്ലാതെ ആശയവിനിമയം ചെയ്യാന്‍ കഴിയും വിധം വിവര വിനിമയ സാങ്കേതിക വിദ്യയുടെ വികാസം നടന്നിരിക്കുന്നു. ഈ സാമൂഹ്യ നേട്ടത്തിന്റെ ഉറവിടം നാളിതു് വരെ ലോകമാകെ ഏറിയ പങ്കും പൊതു മേഖലയില്‍ പ്രവര്‍ത്തിച്ചു് പോന്ന ടെലികോം സേവന സംവിധാനമെന്നതു് പോലെ ടെലകോം ഉപകരണങ്ങളുടെ ഉല്പാദന മേഖലയുമായിരുന്നു. എന്നാല്‍ ഈ നേട്ടങ്ങളുടെ ഗുണഫലം സ്വകാര്യ മൂലധനത്തിനു് കയ്യടക്കാനുള്ള അവസരം ഒരുക്കി കൊടുക്കുകയാണു് മുതലാളിത്ത ഭരണകൂടങ്ങള്‍ നിലവില്‍ ചെയ്തു് കൊണ്ടിരിക്കുന്നതു്. അതിനായി ടെലികോം സേവന-നിര്‍മ്മാണ മേഖലകള്‍ സ്വകാര്യ കുത്തകകള്‍ക്കു് കൈമാറുന്നു. ടെലികോം മേഖലയ്ക്കു് പുറത്തു് വിവര സാങ്കേതിക മേഖല എന്ന വലിയൊരു വ്യവസായ സാമ്രാജ്യം തന്നെ വളര്‍ന്നു് വികസിച്ചിരിക്കുന്നു. സാമൂഹ്യ സമ്പത്തിന്റെ സ്വകാര്യ കയ്യേറ്റം അനുവദിച്ചു് കൊടുക്കുന്ന മറ്റു് പലതും പോലെ ഒരു മേഖലയായി ടെലികോം മേഖലയും മാറിയിരിക്കുന്നു. ടെലികോം മേഖലയുടെ കാര്യത്തില്‍ ഈ കയ്യേറ്റത്തിന്റെ പ്രത്യാഘാതം വളരെ വലുതായിരിക്കും.

കാരണം, വിവര വിനിമയത്തിന്റെ സാര്‍വ്വത്രികതയുടെ അടിസ്ഥാനം പ്രകൃതി വിഭവമായ സ്പെക്ട്രത്തെ അടിസ്ഥാനമാക്കിയുള്ള വികാസമാണു്. വെള്ളം പോലെ, വായു പോലെ, ആസൂത്രിതമായാണെങ്കില്‍ എത്രവേണമെങ്കിലും എടുത്തുപയോഗിക്കാവുന്ന ഒന്നായ സ്പെക്ട്രം സ്വകാര്യ മൂലധനത്തിനു് കൈമാറുന്നതു് സമൂഹത്തോടുള്ള വലിയൊരു വെല്ലുവിളിയാണു്. മാത്രമല്ല, ആശയ വിനിമയ രംഗത്തെ മൂലധന കുത്തകകളുടെ സ്വാധീനം വിദ്യാഭ്യാസവും ആരോഗ്യവും ബാങ്കിങ്ങും ധനകാര്യവും ആസൂത്രണവും ഭരണ നിര്‍വ്വഹണവും പോലെ ഇതര അവശ്യ സേവന മേഖലകളിലും മൂലധന കുത്തകകളുടെ ആധിപത്യം അരക്കിട്ടുറപ്പിക്കാനുപയോഗിക്കപ്പെടുകയും ചെയ്യും. മൊത്തത്തില്‍, ഈ രംഗത്തെ ചൂഷണം മാത്രമല്ല, എല്ലാ മേഖലകളിലും ധനമൂലധന കുത്തകയുടെ സമഗ്രാധിപത്യം സമൂഹത്തിനു് മേല്‍ അടിച്ചേല്പിക്കുന്നതിന്റെ ഉപാധിയായി കൂടി ഈ സാമൂഹ്യ സമ്പത്തിന്റെ കയ്യേറ്റത്തെ കാണണം.

ടെലികോം രഗത്തെ പൊതു മേഖലയുടെ സാന്നിദ്ധ്യം ഇന്ത്യയില്‍ ഇന്നു് പത്തിലൊന്നിലും താഴെയായി മാറിക്കഴിഞ്ഞിരിക്കുന്നു. മുപ്പതു് ശതമാനത്തിനു് താഴെയായതോടെ കമ്പോളത്തിലെ നിര്‍ണ്ണായക ഇടപെടല്‍ സാധ്യത പൊതുമേഖലയ്ക്കു് നഷ്ടപ്പെട്ടു് കഴിഞ്ഞു. ഇനി എന്നു് പൊതുമേഖല ഈ രംഗത്തു് നിന്നു് നിഷ്ക്രമിക്കുമെന്നു് മാത്രമേ കാണേണ്ടതുള്ളു. അതാകട്ടെ സര്‍ക്കാരിന്റെ ഒരു ഉത്തരവിനെ മാത്രം ആശ്രയിച്ചിരിക്കുന്നു. സര്‍ക്കാരിന്റെ അത്തരം ഏക പക്ഷീയമായ തിട്ടൂരങ്ങളെ ചെറുക്കാനുള്ള പൊതു മേഖലാ ടെലികോം തൊഴിലാളി സംഘടനകളുടെ ശേഷി ഇന്നു് വലിയൊരു ചോദ്യചിഹ്നം തന്നെയാണു്. ഉപഭോക്താക്കളായ ജനങ്ങളാകട്ടെ പൊതു മേഖലയുടെ പ്രാധാന്യം വേണ്ടത്ര മനസിലാക്കുന്നുമില്ല. മനസിലാക്കുന്നവര്‍ക്കു് പോലും പൊതു മേഖലയുടെ സേവനം മാത്രം കൊണ്ടു് ആവശ്യങ്ങള്‍ നിറവേറ്റാനുതകും വിധം പൊതു മേഖലയുടെ സാന്നിദ്ധ്യം ഇല്ലാതെയുമായിരിക്കുന്നു. അതേ സമയം, ടെലികോം രംഗത്തു് നിന്നു് പൊതു മേഖല പുറത്തായാല്‍ പിന്നെ ഉപഭോക്താക്കളാകെ സ്വകാര്യ കുത്തകകളുടെ ദയാദാക്ഷിണ്യത്തിലായിരിക്കും. അപ്പോഴേയ്ക്കും പരിഹാരം അസാദ്ധ്യമായിക്കഴിഞ്ഞിരിക്കുകയും ചെയ്യും.

ഇതിന്റെ മറുവശം, സാങ്കേതികവിദ്യ കൈവരിച്ച ഈ വമ്പിച്ച വികാസം, ടെലികോം മേഖലയെ മൊത്തത്തില്‍ പൊതു മേഖലയേക്കാളും സര്‍ക്കാര്‍ മേഖലയെക്കാളും സാമൂഹ്യമാക്കാനുള്ള സാധ്യതകളാണു് ഒരുക്കിയിട്ടുള്ളതെന്നതാണു്. അടിസ്ഥാന ഘടകമായിട്ടുള്ള സൂക്ഷ്മ വിവര വിശകലനിയടക്കമുള്ള ടെലികോം ഉപകരണങ്ങളുടെ നിര്‍മ്മാണം പൊതു മേഖലയിലുള്ള വന്‍കിട കമ്പനികള്‍ നടത്തുമ്പോള്‍ തന്നെ, അവ വാങ്ങി സ്പെക്ടമോ കേബിളുകളോ ഉപയോഗിച്ചു് ടെലികോം സേവനങ്ങള്‍ സ്വയം ജനങ്ങളുടെ കൂട്ടായ്മകള്‍ക്കു് ഒരുക്കാവുന്നതാണു്. സ്വയംഭരണത്തിന്റെ ഭാഗമായി അവ അനുഭവിക്കാന്‍ സമൂഹത്തിനു് കഴിയും. അതിനു് സ്വകാര്യ കുത്തകകളുടെ ഇടത്തട്ടു് സേവനം ആവശ്യമില്ല തന്നെ. ഇന്നുള്ള പ്രാദേശിക സ്വയംഭരണ സ്ഥാപനങ്ങള്‍ക്കു് (Local Self Govt Institutions - LSGIs) ഇക്കാര്യങ്ങള്‍ ചെയ്യാവുന്നതാണു്. അതല്ലെങ്കില്‍ സ്വയംഭരണ സമൂഹമെന്ന (Self Governing Communities) സങ്കല്പനം ഉപയോഗപ്പെടുത്താവുന്നതാണു്. സാങ്കേതികമായി ഇതു് സാധ്യമാണെന്നതിന്റെ തെളിവാണു് ഇന്നു് വിദേശ കോളുകള്‍ ചോര്‍ത്തിക്കൊടുത്തു് വന്‍കിട ടെലികോം കമ്പനികളുടെ വരുമാനം തട്ടിയെടുക്കുന്ന ഒറ്റപ്പെട്ടതെങ്കിലും കള്ളകമ്പനികളുടെ സാന്നിദ്ധ്യം.

മാത്രമല്ല, ഇന്റര്‍നെറ്റു് പോലെ തന്നെ ടെലികോം ശൃഖലയ്ക്കും വിതരിത ഘടന (Distributed Architecture) തന്നെയാണുള്ളതു്. ശൃംഖലകളുടെ ശൃംഖലയാണു് ദേശീയവും സാര്‍വ്വദേശീയവുമായ ശൃംഖല എന്ന കാര്യം ഈ സാങ്കേതിക വിദ്യയില്‍ സാമാന്യ വിവരമുള്ളവര്‍ക്കു് പോലും അറിയുന്ന കാര്യമാണു്. പക്ഷെ, ഇന്നത്തെ ആഗോള സാമൂഹ്യ മാധ്യമ ശൃംഖല അമേരിക്കയിലെ കാലിഫോര്‍ണിയയില്‍ കേന്ദ്രീകരിച്ചിരിക്കുന്നതു് കണ്ടു് വളരുന്ന സമൂഹം ഇന്റര്‍നെറ്റിനു് കേന്ദ്രീകൃത ഘടനയാണുള്ളതെന്ന വളരെ വികലമായ ധാരണ വെച്ചു് പുലര്‍ത്തുന്നതു് ബദല്‍ സാധ്യതകള്‍ ഉപയോഗപ്പെടുത്തുന്നതിനു്തടസ്സം സൃഷ്ടിക്കുന്നുണ്ടു്. നിലവിലുള്ള സാമൂഹ്യ മാധ്യമ ശൃംഖല ആഗോളമായി കേന്ദ്രീകരിച്ചിരിക്കുന്നു എന്നതു് ശരിയാണു്. കാരണം സാമൂഹ്യ മാധ്യമങ്ങളുടെ വിതരിത ഘടന ജനങ്ങള്‍ വ്യാപകമായി ഉപയോഗിക്കുന്നില്ല എന്നതു് മാത്രമാണു്. അതേ സമയം, ഈ ആഗോള സാമൂഹ്യ മാധ്യമ ശൃംഖലയുടെ സെര്‍വ്വറുകള്‍ മാത്രമാണു് കുത്തകകളുടേതായിട്ടുള്ളതു്. ഉപയോക്താക്കളുടെ ഉപകരണങ്ങളും പ്രാദേശിക സെര്‍വ്വറുകളും അവയും കേന്ദ്ര സെര്‍വ്വറുകളുമായുള്ളതടക്കം എല്ലാ ബന്ധ മാധ്യമങ്ങളും ജനങ്ങളുടെ വകയാണു്. പൊതു മേഖലയിലോ സ്വകാര്യ മേഖലയിലോ ഉള്ള ദേശീയ ടെലികോം സേവന ദാതാക്കളാണു് അവയെല്ലാം ഒരുക്കിയിട്ടുള്ളതു്. അതായതു് ആഗോള സാമൂഹ്യ മാധ്യമങ്ങള്‍ സെര്‍വ്വറുകള്‍ മാത്രം കൈവശം വെച്ചു് സാര്‍വ്വദേശീയമായി തദ്ദേശീയ ടെലികോം വിഭവങ്ങള്‍ യാതൊരു ചെലവുമില്ലാതെ ഉപയോഗിച്ചു് വിവരം കേന്ദ്രീകരിക്കുകയും അവ ദുരുപയോഗം ചെയ്തു് വരുമാനമുണ്ടാക്കുകയും സാമ്രാജ്യത്വ താല്പര്യത്തില്‍ അവ യുഎസ് സര്‍ക്കാരിനു് ചോര്‍ത്തിക്കൊടുക്കുകയുമാണു് ചെയ്യുന്നതു്. (അമേരിക്കന്‍ നാഷണല്‍ സെക്യൂരിറ്റി ഏജന്‍സിയുടെ സാങ്കേതിക കോണ്‍ട്രാക്ടറും സ്വതന്ത്ര സോഫ്റ്റ്‌വെയര്‍ സംരംഭകനുമായിരുന്ന എഡ്വേര്‍ഡു് സ്നോഡന്റെ വെളിപ്പെടുത്തലുകള്‍ ഓര്‍മ്മിക്കുക).

ചുരുക്കത്തില്‍, ടെലികോം സേവന ദാതാക്കള്‍ പശ്ചാത്തല സൌകര്യം മാത്രം ഒരുക്കി കൊടുത്തു് വരുമാന സ്രോതസുകളായ മേല്‍ത്തട്ടു് വിവര സേവനങ്ങള്‍ ആഗോള കുത്തകകള്‍ക്കു് അടിയറ വെയ്ക്കേണ്ടതില്ല. അവയും ഒരുക്കിക്കൊടുത്തു് വരുമാനമുണ്ടാക്കാന്‍ ദേശീയ സേവന ദാതാക്കള്‍ തയ്യാറാകണം. ബിഎസ്എന്‍എല്‍ ഇത്തരം സേവനങ്ങള്‍ കൊടുത്തു് തുടങ്ങണം. അതിലൂടെ സാമ്രാജ്യത്യാധിപത്യത്തോടുള്ള വിധേയത്വം ഏറിയെ പങ്കും ഒഴിവാക്കാനുമാകും.

മറ്റൊരു വശത്തു്, ടെലികോം രംഗത്തിന്റെ വികാസ ഫലമായ ഐടി സേവനങ്ങളുടെ ഉപഭോക്താക്കളായി ബിഎസ്എന്‍എല്‍ മാറിയിരിക്കുന്നു. ഇതു് തികച്ചും അയുക്തികവും അനാവശ്യവുമാണു്. ബിഎസ്എന്‍എല്‍ ന്റെ സേവന പ്രദാനവും ഭരണ നിര്‍വ്വഹണവും നടത്തുന്നതിനു് SAP ഏര്‍പ്പെടുത്തിയതു് 6000 കോടി രൂപയുടെ ആദ്യ നിക്ഷേപം മുടക്കിയാണു്. അതിന്നും ഫലപ്രദമായി പ്രവര്‍ത്തിക്കുന്നുമില്ല. 600 കോടിയില്‍ തടങ്ങി ഓരോ വര്‍ഷവും വര്‍ദ്ധിച്ചു് വരുന്ന വാര്‍ഷിക മെയിന്റനന്‍സ് ചെലവു് ഇന്നു് 900 കോടിയോളം എത്തിയിരിക്കുന്നു. വാര്‍ഷിക മെയിന്റനന്‍സ് ചെലവിന്റെ പകുതി തുക കൊണ്ടു് ബിഎസ്എന്‍എല്‍ നു് ഇതിനേക്കാല്‍ മെച്ചപ്പെട്ട സേവന ശൃംഖല സ്വന്തമായി സ്ഥാപിച്ചുപയോഗിക്കാം. മാത്രമല്ല, ഒരിക്കല്‍ അതിന്റെ സാങ്കേതികവിദ്യ സ്വായത്തമായിക്കഴിഞ്ഞാല്‍ ഇന്ത്യയിലെ എല്ലാ സ്ഥാപനങ്ങളുടേയും ശൃംഖലാധിഷ്ഠിത സേവനങ്ങള്‍ കുറഞ്ഞ ചെലവില്‍ ക്ലൌഡ് മാതൃകയില്‍ നല്‍കുന്ന സ്ഥാപനമായി ബിഎസ്എന്‍എല്‍ നു് മാറാം. ബാങ്കു്, ഇന്‍ഷുറന്‍സ്, അടക്കം എല്ലാ പൊതു മേഖലാ സ്ഥാപനങ്ങളുടേയും കേന്ദ്ര സംസ്ഥാന സര്‍ക്കാര്‍ വകുപ്പുകളുടേയും ശൃംഖലാധിഷ്ഠിത സേവനങ്ങളുടെ വിതരിത ഡാറ്റാ സെന്ററുകള്‍ സ്ഥാപിച്ചു് നല്‍കുക എന്ന സേവനം ബിഎസ്എന്‍എല്‍ നു് ചെയ്യാവുന്നതാണു്. ഇന്നു് അപ്രസക്തമായി വരുന്ന എക്സ്ചേഞ്ചു് പശ്ചാത്തല സൌകര്യങ്ങളായ ജനറേറ്ററും ബാറ്ററിയും യുപിഎസും സ്ഥലസൌകര്യവും അടക്കം വിഭവങ്ങളുടെ മൂല്യം വര്‍ദ്ധിപ്പിക്കുന്ന സേവനമാണിതു്. മാത്രമല്ല, ബിഎസ്എന്‍എല്‍ ന്റെ ലൈനുകളുടെ വിപണനം വര്‍ദ്ധിപ്പിക്കുന്നതിനുള്ള മാര്‍ഗ്ഗവുമാണതു്. ക്ലൌഡ് കേന്ദ്രങ്ങളായി വരുമാനസൃഷ്ടി നടത്തുകയും അതിലൂടെ സ്വന്തം ലൈനുകളുടെ വിപണനം ഉയര്‍ത്തുകയും അടക്കം ഒട്ടേറെ മൂല്യ വര്‍ദ്ധിത സേവനങ്ങളിലൂടെ സ്വന്തം കാലില്‍ നിന്നു് ജനങ്ങളെ സേവിക്കുന്ന സ്ഥാപനമായി ബിഎസ്എന്‍എല്‍ നു് മാറാം.

പകരം, ഇവിടെ നിര്‍മ്മിച്ചുപയോഗിക്കാവുന്ന ഉപകരണങ്ങളെല്ലാം (85% ഉം) വലിയ വില നല്‍കി ഇറക്കുമതി ചെയ്യുകയും സ്വന്തമായി വികസിപ്പിക്കാവുന്ന സേവന പ്രദാന-ഭരണ നിര്‍വ്വഹണ സംവിധാനങ്ങള്‍ വളരെ കൂടിയ സേവനത്തുക നല്‍കി ഏര്‍പ്പെടുത്തുതയും ചെയ്യുന്നതടക്കം ധൂര്‍ത്തില്‍ ആറാടുന്നതിലൂടെയാണു് ബിഎസ്എന്‍എല്‍ അതിന്റെ ഇന്നത്തെ പതനത്തിലെത്തിയിട്ടുള്ളതു്. ജിവനക്കാരുടെ സേവന വേതന വ്യവസ്ഥകള്‍ കര്‍ശനമാക്കാനും ആനുകൂല്യങ്ങള്‍ വെട്ടിക്കുറയ്ക്കാനും ശമ്പള പരിഷ്കരണം നിഷേധിക്കാനും ഈ നഷ്ടത്തിന്റെ കണക്കാണു് ഉപയോഗിക്കുന്നതു്. നഷ്ടം തനിയെ ഉണ്ടാകുന്നതല്ല. മാനേജ്മെന്റു് ദൌര്‍ബ്ബല്യങ്ങളും ധൂര്‍ത്തും മൂലവും മനപൂര്‍വ്വം നഷ്ടത്തിലാക്കി സ്വകാര്യവല്കരിക്കുക എന്ന ലക്ഷ്യം മുന്‍നിര്‍ത്തിയും വരുത്തി വെയ്ക്കുന്നതാണു്. വരുമാനം വര്‍ദ്ധിപ്പിക്കാനുള്ള വികസന-വൈവിദ്ധ്യവല്കരണ പദ്ധതികള്‍ ആവിഷ്കരിച്ചു് നടപ്പിലാക്കിയും ചെലവു് കുറയ്ക്കാന്‍ വേണ്ടി ഇറക്കു് മതിക്കു് പകരമുള്ള ഉല്പാദനശേഷിയും സ്വയംനവീകരണശേഷിയും ആര്‍ജ്ജിക്കുകയും ചെയ്തു് കൊണ്ടു് ബിഎസ്എന്‍എല്‍ നു് ഇനിയും അതിന്റെ പ്രസക്തിയും പ്രാധാന്യവും തിരിയെ പിടിക്കാം.

അതിന്റെ തുടര്‍ച്ചയില്‍ ബിഎസ്എന്‍എല്‍ അടിസ്ഥാന സൌകര്യങ്ങള്‍ ഒരുക്കുകയും ഉപകരണങ്ങളുടെ ഉല്പാദനം നടത്തുകയും ചെയ്യുന്ന പൊതു മേഖലാ സംരംഭമായി ഉയരുകയും സേവനങ്ങള്‍ ആവശ്യാനുസരണം അനുഭവിക്കുന്ന സ്വയംഭരണ സമൂഹങ്ങളുടെ അതി വിപുലമായ ശൃംഖലയ്ക്കു് അവ ലഭ്യമാക്കുകയും വേണം. അത്തരത്തില്‍ ആശയ വിനിമയ ശൃംഖല സാമൂഹ്യമാക്കി മാറ്റിക്കൊണ്ടു് സ്വതന്ത്ര വിജ്ഞാന സമൂഹ സൃഷ്ടിയുടെ പ്രേരക ശക്തിയായി ടെലികമ്മ്യൂണിക്കേഷന്‍ മേഖല മാറണം.

പെന്‍ഷന്‍ ദിന ചിന്തകള്‍, 2017 - ജോസഫ് തോമസ്

ഈ വര്‍ഷത്തെ പെന്‍ഷന്‍ ദിന ചിന്തകളില്‍, 1982 ഡിസംബര്‍ 17നു് നകാര കേസ് ഉറപ്പാക്കിയ പെന്‍ഷന്‍ തുല്യതയോടും തൊഴിലാളികള്‍ പൊതുവെ ആവശ്യപ്പെടുന്ന സാര്‍വ്വത്രിക പെന്‍ഷന്‍ ലഭ്യതയോടുമൊപ്പം പെന്‍ഷനടക്കം സാമൂഹ്യ സുരക്ഷിതത്വത്തിന്റേയും തൊഴിലാളികളുടെ വേതനത്തിന്റേയും കര്‍ഷകരുടെ വരുമാനത്തിന്റേയും മാത്രമല്ല, സമൂഹത്തിന്റെയാകെ ജീവിത പ്രശ്നങ്ങള്‍ പരിശോധിക്കേണ്ട അവസ്ഥയാണുള്ളതു്. ജനങ്ങളുടെ ജീവിത സാഹചര്യങ്ങള്‍ക്കു് മേല്‍ വമ്പിച്ച കടന്നാക്രമണമാണു് ആഗോള-ദേശീയ ധന മൂലധന കുത്തകകള്‍ നടത്തിക്കൊണ്ടിരിക്കുന്നതു്. കള്ളപ്പണത്തിനും കള്ളനോട്ടിനുമെതിരെ എന്ന പേരില്‍ നടത്തിയ നോട്ടു് പിന്‍വലിക്കലും നികുതി ഏകീകരണത്തിന്റെ പേരില്‍ നടപ്പാക്കിയ ജിഎസ്ടിയും കൂടി അസംഘടിത മേഖലയെ ആശ്രയിക്കുന്ന വലിയൊരു വിഭാഗം സാധാരണക്കാരുടെ ജീവിതമാര്‍ഗ്ഗം തകര്‍ത്തു് തരിപ്പണമാക്കി. പൂട്ടിപ്പോയ വ്യവസായങ്ങളും നഷ്ടപ്പെട്ട തൊഴില്‍ ദിനങ്ങളും മൂലം സാധാരണക്കാര്‍ക്കുണ്ടായ ക്ഷീണം ധനമൂലധന ശക്തികള്‍ക്കുണ്ടായ നേട്ടത്തിലൂടെ പരിഹരിക്കാനാവുന്നതല്ല. അവിടെ കാര്യമായി തൊഴില്‍ വര്‍ദ്ധിക്കുന്നില്ല എന്നതു് തന്നെ കാരണം. പിന്നീടിതാ ഇടത്തരക്കാരുടെ ജിവിതത്തേയും അവരുടെ നിക്ഷേപത്തേയും കടന്നാക്രമിക്കുന്ന ബാങ്കിങ്ങു് പരിഷ്കരണം വരുന്നു. നാളിതു് വരെ ധനമൂലധന കുത്തകകള്‍ വായ്പകളെടുത്തു് തിരിമറി ചെയ്തു് സമ്പത്തു് കുന്നു് കൂട്ടുന്നതു് മൂലമുണ്ടാകുന്ന കിട്ടാക്കടത്തിന്റെ ബാധ്യതകള്‍ കാരണം തകര്‍ന്നടിയുന്ന ബാങ്കുകളെ രക്ഷിക്കാന്‍ സര്‍ക്കാര്‍ റവന്യൂ വരുമാനം (പൊതുസ്വത്തു്) ഉപയോഗിച്ചു് ജാമ്യ പാക്കേജുകള്‍ നടപ്പാക്കുകയായിരുന്നു ചെയ്തു് പോന്നതു്. എന്നാല്‍ പുതിയ പരിഷ്കാരം നിക്ഷേപകരുടെ സ്ഥിര നിക്ഷേപം ഓഹരിനിക്ഷേപമായി നിര്‍ബ്ബന്ധപൂര്‍വ്വം മാറ്റിക്കൊണ്ടു് ബാങ്കുകളുടെ ധനകാര്യ പ്രതിസന്ധി പരിഹരിക്കുകയാണു്. സാധാരണക്കാരുടെ സ്ഥിര നിക്ഷേപങ്ങള്‍ ആവശ്യപ്പെടുമ്പോള്‍ തിരിച്ചു് കിട്ടുമെന്നു് ഉറപ്പില്ലാതാകുമെന്നതാണു് ഫലം. ചുരുക്കത്തില്‍ ജനങ്ങളുടെ സമ്പത്തു് മറയേതുമില്ലാതെ നിര്‍ല്ലജ്ജം ധനമൂലധന കുത്തകകള്‍ക്കു് ചോര്‍ത്തി കൊടുക്കുകയും ചെറുകിട ഇടത്തരം വ്യാവസായ സംരംഭകരേയും സ്വയംതൊഴില്‍ സംരംഭകരേയും തകര്‍ത്തു് കുത്തകകളെ വളര്‍ത്തുകയുമാണു്.

ഇതെല്ലാം നടക്കുന്നതിനുള്ള പശ്ചാത്തലം, നിലവിലുള്ള മൂലധനാധിപത്യ വ്യവസ്ഥ നേരിടുന്ന അതിഗുരുതരമായ പ്രതിസന്ധിയാണു്. ഇന്നത്തെ വ്യവസ്ഥയുടെ ശക്തിയല്ല, മറിച്ചു് ദൌര്‍ബ്ബല്യങ്ങളാണു് ഈ പുതിയ കടന്നാക്രമണങ്ങളും നയപരിപാടികളും കാട്ടിത്തരുന്നതു്. ബദല്‍ സംവിധാനത്തേക്കുറിച്ചു് ജനങ്ങള്‍ക്കു് അവബോധമില്ലാത്തതു് മാത്രമാണു് നിലനില്പിനര്‍ഹത നഷ്ടപ്പെട്ട മുതലാളിത്തം തുടരുന്നതിനു് കാരണം.

മുതലാളിത്ത വ്യവസ്ഥ സമൂഹത്തെ അതി ഗുരുതരമായ പ്രതിസന്ധിയിലാണു് കൊണ്ടെത്തിച്ചിരിക്കുന്നതു്. അന്ധമായി പ്രകൃതിയെ ആശ്രയിച്ചുള്ള കൃഷിയില്‍ നിന്നു് ഉല്പാദനവര്‍ദ്ധനവിനായി കൃത്രിമ കൃഷിയിലേയ്ക്കുള്ള മാറ്റം മനുഷ്യനെ പ്രകൃതിയുടെ കോപത്തിനു് ഇരയാക്കി മാറ്റുന്നു. ലാഭത്തിനു് വേണ്ടിയുള്ള അത്യാര്‍ത്തി മൂലം പ്രകൃതിയ്ക്കും പരിസ്ഥിതിയക്കും ഉണ്ടാകുന്ന വമ്പിച്ച നാശം മനുഷ്യവംശത്തെ അപകടത്തിലേയ്ക്കു് തള്ളിവിടുന്നു. പ്രകൃതി ദുരന്തങ്ങളുടെ കുറഞ്ഞ ഇടവേളകളിലെ ആവര്‍ത്തനം അനേകരുടെ ജീവിതം തകര്‍ത്തെറിയുന്നു. അതില്‍ നിന്നു് നാം പഠിക്കേണ്ട പാഠം പ്രകൃതിയെ ബോധപൂര്‍വ്വം അനുസരിച്ചും അനുകരിച്ചും പ്രകൃതിയ്ക്കനുയോജ്യമായ മാര്‍ഗ്ഗങ്ങള്‍‍ അവലംബിച്ചും അതതു് പ്രദേശത്തു് സാധ്യമായ കാര്‍ഷികോല്പാദനം ഉറപ്പാക്കേണ്ടതിന്റെ ആവശ്യകതയാണു്.

വ്യാവസായികോല്പാദന രംഗത്തു് അതേ പോലെ തന്നെ, മനുഷ്യാദ്ധ്വാന ശേഷി മാത്രം ഉപയോഗിച്ചിരുന്നിടത്തു് നിന്നു് ഉപകരണങ്ങളും യന്ത്രങ്ങളും സ്വയം പ്രവര്‍ത്തിക്കുന്ന യന്ത്രങ്ങളും കഴിഞ്ഞു് സ്വയം നിയന്ത്രിക്കുന്ന യന്ത്രങ്ങളിലേയ്ക്കു് സമൂഹം വളര്‍ന്നിരിക്കുന്നു. ഇതിന്റെയെല്ലാം ഫലമാകട്ടെ ഉപകരണങ്ങളുടേയും യന്ത്രങ്ങളുടേയും വലിപ്പത്തിലും കഴിവിലുമുള്ള അപാരമായ വര്‍ദ്ധനവും വിഭവങ്ങളുടെ വിനിയോഗത്തിലെ കാര്യക്ഷമതയും ഉല്പന്നങ്ങളുടെ ഗുണമേന്മയും ആണു്. ഇവിടെ അദ്ധ്വാനത്തിന്റെ പ്രയോഗത്തിലുണ്ടാകുന്ന മാറ്റം അതിന്റെ ആവശ്യകതയിലുണ്ടാകുന്ന കുറവു് അദ്ധ്വാനപ്രക്രിയകള്‍ക്കിടയിലുണ്ടാകുന്ന അപകടങ്ങള്‍ ഒഴിവാക്കാനും അദ്ധ്വാന ഭാരം ലഘൂകരിക്കാനും ഉപയോഗിക്കാവുന്നതാണു്. ജനജീവിതം മെച്ചപ്പെടുത്താനുപകരിക്കുന്നതാണു്. പകരം അദ്ധ്വാനിക്കുന്നവരെ തൊഴിലാളികളേയും കര്‍കരേയും സ്വയംതൊഴില്‍ സംരംഭകരേയും പട്ടിണിക്കിടാനും അവരെ തൊഴിലില്‍ നിന്നും സംരംഭങ്ങളില്‍ നിന്നും കാര്‍ഷിക വൃത്തിയില്‍ നിന്നും പുറത്താക്കാനുമാണു് ഇന്നത്തെ സാമൂഹ്യ വ്യവസ്ഥ ഇടവരുത്തുന്നതു്. അതു്വ്യവസ്ഥയുടെനിലനില്പു് തന്നെ ചോദ്യം ചെയ്യുന്ന സാമ്പത്തിക-ഉല്പാദന-വ്യാപാര പ്രതിസന്ധിയായി ഈട്ടം കൂടുകയുമാണു്. ശാസ്ത്രസാങ്കേതിക സിദ്ധികളുപയോഗിച്ചു് ആസൂത്രണം ചെയ്യപ്പെടുകയും സൃഷ്ടിക്കപ്പെടുകയും ചെയ്യുന്ന അദ്ധ്വാനശേഷിയുടെ ഉല്പാദനക്ഷമതയിലുള്ള വര്‍ദ്ധനവും ഉല്പാദനവും സമ്പത്തും, അദ്ധ്വാനിക്കുന്ന മനുഷ്യനെ പട്ടിണിക്കിടുകയും സമൂഹത്തെ ദുരിതത്തിലേയ്ക്കും പ്രതിസന്ധിയിലേയ്ക്കും നയിക്കുകയും ചെയ്യുന്ന വൈരുദ്ധ്യം പരിഹരിക്കുകയാണു് വ്യവസ്ഥാ മാറ്റത്തിന്റെ ഉള്ളടക്കം.

വിജ്ഞാനത്തിന്റെ രംഗത്താകട്ടെ, അദ്ധ്വാനത്തിന്റെ ഉല്പന്നമെന്ന നിലയില്‍ സൃഷ്ടിക്കപ്പെടുകയും ഉല്പാദനത്തിന്റെ ആവശ്യകതയ്ക്കനുസരിച്ചു് വളരുകയും പടര്‍ന്നു് പന്തലിക്കുകയും ചെയ്ത അറിവു് ഇന്നു് അദ്ധ്വാനത്തില്‍ നിന്നും ഉല്പാദനത്തില്‍ നിന്നും ആപേക്ഷിക സ്വാതന്ത്ര്യം നേടി സ്വതന്ത്രമായ അസ്ഥിത്വം കൈവരിച്ചിരിക്കുന്നു എന്ന പ്രതീതി സൃഷ്ടിക്കുന്നു. ഉപകരണങ്ങള്‍ ചെറുതാകുന്നു. യന്ത്രങ്ങള്‍ ചെറുതാകുന്നു. എന്നാല്‍ അവയുടേയെല്ലാം കഴിവും പ്രയോഗക്ഷമതയും ഉയരുന്നു. ഉല്പന്നങ്ങളുടേയും യന്ത്രങ്ങളുടേയും രൂപകല്പനയും ഉല്പാദനവും കൂടുതല്‍ കൂടുതല്‍ അറിവിനെ ആശ്രയിച്ചതാകുന്നു. ഈ പ്രക്രിയകളെല്ലാം സാധാരണക്കാര്‍ക്കു് അന്യമാകുന്നു. വിദ്യാഭ്യാസം ജീവിത പ്രക്രിയകളില്‍ നിന്നു് അന്യവല്കരിക്കപ്പെട്ടിരിക്കുന്നു. അതായതു് കര്‍ഷകരും തൊഴിലാളികളും സൃഷ്ടിച്ചു് അദ്ധ്വാനത്തിന്റെ വികാസത്തിലൂടെ വളര്‍ന്ന അറിവു് ഇന്നു് കര്‍കരേയും തൊഴിലാളികളേയും പട്ടിണിക്കിടാനുള്ള ഉപാധിയായി പ്രയോഗിക്കപ്പെടുന്നു. ഉല്പന്നങ്ങളെന്ന പോലെ അറിവും കര്‍ഷകര്‍ക്കും തൊഴിലാളികള്‍ക്കും അതായതു് സാധാരണക്കാര്‍ക്കു് അന്യമാകുന്നു. അറിവു് ആര്‍ജ്ജിക്കുന്നതിനുള്ള മാര്‍ഗ്ഗമായി വിദ്യാഭ്യാസത്തെ കാണുമ്പോള്‍ തന്നെ അതിനെ നിത്യജീവിതത്തിന്റേയും പ്രായോഗിക പ്രവര്‍ത്തനത്തിന്റേയും ഭാഗമാക്കിക്കൊണ്ടല്ലാതെ അറിവു് നേടുന്നതിലും നമുക്കു് മുന്നേറാനാവില്ല.

സാമൂഹ്യമായി, മനുഷ്യനും ഉല്പന്നങ്ങളും ഉപകരണങ്ങളും യന്ത്രങ്ങളും അറിവും തമ്മിലുള്ള പാരസ്പര്യം വീണ്ടെടുത്തല്ലാതെ ഇന്നു് സൃഷ്ടിക്കപ്പെടുന്ന അന്യവല്കരണത്തിനും അതുണ്ടാക്കുന്ന പ്രതിസന്ധികള്‍ക്കും പരിഹാരം കാണാനാവില്ല. ഇനിയങ്ങോട്ടു് ഇങ്ങിനെ തുടരാനാവില്ല എന്ന സ്ഥിതി സംജാതമായിരിക്കുന്നു.

മേല്പറഞ്ഞ മാറ്റങ്ങള്‍ ശ്രദ്ധിക്കാതെ പോയാല്‍ നാം ആഗ്രഹിക്കുന്ന പെന്‍ഷനും പെന്‍ഷന്റെ ഉറപ്പും സാമൂഹ്യ സുരക്ഷിതത്വവും ജീവിത ഗുണമേന്മയും കിട്ടാക്കനിയാകുമെന്നതാണു് ഇന്നു് പെന്‍ഷന്‍ കാര്‍ നേരിടുന്ന പ്രശ്നം. തൊഴിലാളികളാഗ്രഹിക്കുന്ന വേതനവും തൊഴില്‍ സ്ഥിരതയും മെച്ചപ്പെട്ട സേവന വേതനവ്യവസ്ഥകളും അവര്‍ക്കും കിട്ടാതാകും. കര്‍ഷകര്‍ക്കു് വിളവും വിളകള്‍ക്കു് ന്യായമായ വിലയും കിട്ടാതാകും. സ്വയംതൊഴില്‍ സംരംഭകര്‍ കുത്തക മൂലധനത്തിന്റെ ലാഭം വര്‍ദ്ധിപ്പിക്കുന്ന വെറും അടിമകളായി മാറും.

പരിഹാരം പ്രകൃതിയെ അന്ധമായി അനുകരിക്കുന്നതിനു് പകരം പ്രകൃതിയിലുള്ള ആഘാതവും പരിസ്ഥിതി നാശവും ഒഴിവാക്കിക്കൊണ്ടു് നേട്ടങ്ങള്‍ കൊയ്യുക എന്നതാണു്. ഉപകരണങ്ങളേയും യന്ത്രങ്ങളേയും അറിവിനേയും അന്ധമായി പിന്തുടരുന്നതിനു് പകരം തൊഴിലും വരുമാനവും ഉയര്‍ത്താനും തൊഴിലിന്റെ കാഠിന്യവും  തൊഴിലിടങ്ങളിലെ അപകടങ്ങളും കുറയ്ക്കാനുമായി ഉപയോഗിക്കുകയാണു് വേണ്ടതു്. ആസൂത്രിതമായും ബോധപൂര്‍വ്വവും ഉള്ള ഇടപെടലുകളാണു് വേണ്ടതു്. അതിനാവശ്യമായ വിവര സാങ്കേതിക വിദ്യയും ശൃംഖലയും തയ്യാറായി കഴിഞ്ഞിരിക്കുന്നു. വിവര സഞ്ചയത്തിലും ശൃംഖലയിലും കുത്തകയല്ല, മറിച്ചു് സാമൂഹ്യ ഉടമസ്ഥതയാണു് ഉറപ്പിക്കേണ്ടതു്. കേന്ദ്രീകൃകമല്ല, വിതരിത ഘടനയാണു് അവയ്ക്കുണ്ടാകേണ്ടതു്. ഈ പശ്ചാത്തലത്തില്‍ വേണം പെന്‍ഷന്‍കാരുടെ പ്രശ്നവും കാണേണ്ടതു്.

പെന്‍ഷന്‍ കിട്ടണമെങ്കില്‍ സ്ഥാപനം നിലനില്കണം. ബിഎസ്എന്‍എല്‍ നിലനില്കണം. ഇല്ലെങ്കിലും ബിഎസ്എന്‍എല്‍ പെന്‍ഷന്‍കാര്‍ക്കു് പെന്‍ഷന്‍ കിട്ടുമെന്ന ഉറപ്പു് കടലാസില്‍ നിലനില്കുന്നുണ്ടു്. 37A വകുപ്പു് ബിഎസ്എന്‍എല്‍കാര്‍ക്കു് കേന്ദ്ര സര്‍ക്കാര്‍ പെന്‍ഷന്‍ ഉറപ്പാക്കുന്നു. അതു് ചോദിച്ചിട്ടു് കിട്ടിയതല്ലെങ്കിലും ഔദാര്യമായിരുന്നില്ല. അതു് കിട്ടിയതു് തന്നെ, സ്വകാര്യവല്കരണത്തിനെതിരായി തൊഴിലാളികള്‍ നടത്തിയ ധീരോദാത്തമായ സമരങ്ങളുടെ ഫലമായാണു്. അടിസ്ഥാനപരമായ ആവശ്യങ്ങളുന്നയിക്കുമ്പോഴാണു് ഉപരിതലത്തിലുള്ളതെങ്കിലും പല ആവശ്യങ്ങളും അംഗീകരിക്കപ്പെടുന്നതു്.

അതേസമയം, പൊതുമേഖലയ്ക്കെതിരായ സര്‍ക്കാര്‍ നയം ജനങ്ങള്‍ക്കു് വേണ്ടിയല്ല, മറിച്ചു് മൂലധനവളര്‍ച്ചയുടെ താല്പര്യത്തിനു് വേണ്ടിയാണെന്ന കാര്യം കാണാതെ പോയിക്കൂടാ. അങ്ങിനെ വരുമ്പോള്‍ സ്ഥാപനങ്ങളും അതു് വഴി തൊഴില്‍ സംഘടനകളും നശിപ്പിക്കപ്പെട്ടു് കഴിഞ്ഞാല്‍, പിന്നെ അടുത്ത പടി നേരിട്ടു് വേതനവും സേവന വേതന വ്യവസ്ഥകളും തൊഴിലും തന്നെ ആക്രമിക്കപ്പെടുക എന്നതാണു്. പ്രതിരോധത്തിനു് സ്ഥാപനമോ സ്ഥാപനതല സംഘടനകളോ ഇല്ലാത്ത അവസ്ഥയായിരിക്കുമതു്. പിന്നെ ബാക്കിയുണ്ടാകുക സാമൂഹ്യ സംഘടനകളും രാഷ്ട്രീയ സംഘടനകളും മാത്രമായിരിക്കും. അതിനോടാകട്ടെ, തൊഴിലാളികള്‍ക്കു് വിമുഖതയാണിന്നുള്ളതു്. ഇത്തരം അരാഷ്ട്രീയത നമ്മെ എവിടെ കൊണ്ടെത്തിക്കുമെന്ന കാര്യം ആലോചിക്കേണ്ടതുണ്ടു്.

സ്ഥാപനം നിലനില്കണമെങ്കില്‍, അതിനു് ജനങ്ങള്‍ക്കു് നല്‍കാന്‍ ഒരു ഉല്പന്നമോ സേവനമോ ഉണ്ടാകണം. ആ സ്ഥാപനം ഒഴിച്ചു് കൂടാനാവത്തതാകണമെങ്കില്‍ മറ്റാര്‍ക്കും കഴിയാത്ത ഉല്പന്നങ്ങളോ സേവനങ്ങളോ അതിനു് നല്‍കാന്‍ കഴിയണം. അങ്ങിനെയാണു് ഒന്നര നൂറ്റാണ്ടോളം ടെലിഗ്രാഫും ടെലിഫോണും സര്‍ക്കാര്‍ പൊതു മേഖലകളില്‍ നിലനിന്നതു്. അന്നു് മറ്റു് വിവര വിനിമയ മാര്‍ഗ്ഗങ്ങളില്ലായിരുന്നു. ഇന്നു് ടെലിഗ്രാഫിനു് പകരം ഇമെയിലും എസ്എംഎസും ചാറ്റു് വേദികളും സുലഭം. ടെലിഗ്രാഫു് ഇല്ലാതാകുകയല്ല, മറിച്ചു് ടെലിഗ്രാമുകളുടെ എണ്ണം ഇ-മെയിലും എസ്എംഎസും ചാറ്റുകളുമായി കോടാനുകോടി മടങ്ങു് പെരുകി വളര്‍ന്നു് വികസിക്കുകയാണു് ചെയ്തതു്. പക്ഷെ, ബിഎസ്എന്‍എല്‍ ആ പുതിയ മേഖല കയ്യൊഴിഞ്ഞു. അതേ പോലെ തന്നെ , ടെലിഫോണും. പണ്ടു് ടെലികോം വകുപ്പോ കമ്മീഷനോ ബിഎസ്എന്‍എലോ ഇല്ലാതെ ടെലിഫോണ്‍ ശൃംഖല സ്ഥാപിക്കുക അസാദ്ധ്യമായിരുന്നു. ഇന്നാകട്ടെ, ഓരോ മെയില്‍ സംവിധാനത്തിലും ചാറ്റിങ്ങു് സംവിധാനത്തിലും പൊതുവെ സാമൂഹ്യ മാധ്യമങ്ങളിലും കൂടി ഉപയോക്താക്കള്‍ക്കു് പരസ്പരം സംസാരിക്കാനുമാവുന്നു. ഇതിന്റെ സാങ്കേതികത ടെലികോം വകുപ്പിന്റെ സംഭാവനയാണു്. പക്ഷെ, അതുപയോഗിക്കുന്നതു് സ്വകാര്യകമ്പനികളാണു്. ഈ മാറ്റമാണു് ബിഎസ്എന്‍എല്‍ ന്റെ ഭാവി അപകടത്തിലാക്കുന്നതു്.

മറ്റൊരു വശത്തു്, ടെലികോം സംവിധാനത്തിന്റെ നട്ടെല്ലായി വളര്‍ന്നു് വന്ന ശൃംഖലയ്ക്കും മാറ്റം വരുന്നു. കമ്പിയ്ക്കു് പകരം കമ്പിയില്ലാകമ്പി (റേഡിയോ) പണ്ടേ തന്നെ നിലവിലുണ്ടായിരുന്നു. അതിന്റെ ഉപകരണങ്ങളുടെ ശേഷിക്കുറവായിരുന്നു അന്നത്തെ പ്രശ്നം. അറുപതുകളിലും എഴുപതുകളിലും പോലും റേഡിയോ ടെലിഗ്രാഫും റേഡിയോ ടെലിഫോണും പ്രവര്‍ത്തിപ്പിച്ചിരുന്നു. കോഴിക്കോട്ടു് നിന്നു മംഗലാപുരവും മംഗലാപുരത്തു് നിന്നു് കവറട്ടിയും തിരുവനന്തപുരത്തു് നിന്നു് മിനിക്കോയിയും തുടങ്ങി പല ടെലിഗ്രാഫു് ടെലിഫോണ്‍ ചാനലുകളും അറുപതുകളില്‍ തന്നെ നിലവില്‍ വന്നിരുന്നു. അങ്ങോട്ടു് കേബിളിടുക ദുഷ്കരമായിരുന്നു. അതിനാല്‍ റോഡിയോ. അതിന്റെ വളര്‍ച്ചയാണു് ഇന്നത്തെ മൊബൈല്‍ സംവിധാനം. സ്പെക്ട്രമാണതിന്റെ മാധ്യമം. സ്പെക്ട്രം അന്നും അലോട്ടു് ചെയ്തിരുന്നു. കമ്പിത്തപാല്‍ വകുപ്പിനും റെയില്‍വേയ്ക്കും കനാല്‍ ശൃംഖലയ്ക്കും പോലീസിനും പ്രതിരോധ വിഭാഗങ്ങള്‍ക്കും മാത്രമായിരുന്നു അന്നു് റോഡിയോ ചാനലുകള്‍ നല്‍കിയിരുന്നതു്. ഇന്നു് അത്തരം ഒരു ചാനലിലൂടെ ലക്ഷക്കണക്കിനു് ലൈനുകള്‍ നിര്‍മ്മിക്കാനാവുന്ന ബഹുചാനല്‍ സംവിധാനങ്ങളും അവ സാധ്യമാക്കുന്ന ഉപകരണങ്ങളും വന്നു എന്നതാണു് മാറ്റം. അതോടെ സ്പെക്ട്രം സ്വകാര്യമേഖലയ്ക്കു് തീറെഴുതി. കമ്പിത്തപാലും റെയില്‍വേയും കനാലും പ്രതിരോധവും സ്പെക്ട്രത്തിന്റെ സ്വകാര്യവല്കരണത്തനു് മൂക സാക്ഷികളായി. അതും കമ്പിത്തപാല്‍ മേഖലയുടെ പരമ്പരാഗത പ്രസക്തി നഷ്ടപ്പെടുത്തി.

ഇന്നിപ്പോള്‍ പ്രസക്തമായ സേവനങ്ങള്‍ വിവര സാങ്കേതിക വിദ്യ ഉപയോഗിച്ചുള്ള ഓണ്‍ലൈന്‍ പ്രക്രിയകളും അതിനാവശ്യമായ ശൃംഖലകളുമാണു്. കമ്പിയും ടെലിഫോണും സാമൂഹ്യ മാധ്യമങ്ങളുടെ ഭാഗമായി മാറി. അവയുടെയെല്ലാം നട്ടെല്ലു് കേബിള്‍ ശൃംഖലകളും സ്പെക്ട്രവുമാണു്. അവയുടെ ഏതാനും കണക്ഷനുകള്‍ക്കു് വേണ്ടി ബിഎസ്എന്‍എല്‍ കെഞ്ചുന്ന കാഴ്ചയാണു് നാമിന്നു് കാണുന്നതു്. അതിനു് കാരണം അവയുടെ സ്വകാര്യവല്കരണത്തെ എതിര്‍ക്കാതെ പോയതാണു്. അതു് എതിര്‍ക്കേണ്ടിയിരുന്നതു് ബിഎസ്എന്‍എല്‍ ന്റെ മാത്രം ബാധ്യതയല്ലായിരുന്നു. മൊത്തം സമൂഹത്തിന്റേതുമായിരുന്നു. 176436 കോടി രൂപയുടെ അഴിമതിയില്‍ മാത്രം എതിര്‍പ്പു് ഒതുങ്ങിപ്പോയി. സര്‍ക്കാര്‍ ഖജനാവിലെത്തിയ 200000 കോടി രൂപയുടെ കണക്കു് ആരും വിശകലനം ചെയ്തില്ല. എന്തിനായി പണം ജനങ്ങളെ പിഴിഞ്ഞുണ്ടാക്കി ? അതു് കൊണ്ടെന്തു് ചെയ്തു ? എന്തിനു് ബിഎസ്എന്‍എല്‍ നു് കൊടുക്കാതെ മറ്റു് സ്വകാര്യ കമ്പനികള്‍ക്കു് അതു് വിലയക്കു് നല്കി ? അതാകട്ടെ, അതേവരെ വിലയിടാത്ത പ്രകൃതി വിഭവവും ! എന്തു് കൊണ്ടു് അതു് ജനങ്ങള്‍ക്കു് അവരുടെ വിവര വിനിമയാവശ്യങ്ങള്‍ക്കായി വിലയീടാക്കാതെ കൊടുത്തു് കൂടാ. പുതിയ പ്രകൃതി വിഭവത്തിനു് വിലയിട്ടു് സ്വകാര്യ മൂലധനത്തിനു് കൈമാറിയതിലൂടെ ജനങ്ങളുടെ ഓരോരുത്തരുടേയും കൈവശമുള്ള സ്വത്തിന്റെ വിലയിടിക്കുകയാണു് സര്‍ക്കാര്‍ ചെയ്തതു്. ഇതെല്ലാം സര്‍ക്കാരിന്റെ കുത്തക മൂലധനത്തോടും സാമ്രാജ്യ മൂലധനത്തോടുമുള്ള പക്ഷ പാതിത്വം തെളിയിക്കുക മാത്രമാണു് ചെയ്യുന്നതു്. ജനങ്ങളോടു് പ്രതിബദ്ധതയില്ലായ്മ വെളിവാക്കപ്പെടുകയാണു്.

ബിഎസ്എന്‍എല്‍ ന്റെ കേബിള്‍ ശൃംഖലയും ടവറുകളും അടക്കം കാതലായ ആസ്തികള്‍ പ്രത്യേകം കമ്പനിക്കു് കൈമാറി ബിഎസ്എന്‍എല്‍ നിലവില്‍ ജനങ്ങള്‍ക്കു് കൊടുത്തുവരുന്ന ടെലിഫോണ്‍ സേവനം അടച്ചു് പൂട്ടുക എന്നതാണു് സര്‍ക്കാര്‍ ഉദ്ദേശിക്കുന്നതു്. അതിനു് പകരം അവ തുടരുന്നതോടൊപ്പം നിലവില്‍ ഉപയോഗമില്ലാതെ കിടക്കുന്ന ബിഎസ്എന്‍എല്‍ ന്റെ നിലവിലുള്ള ടെലിഫോണ്‍ എക്സ്ചേഞ്ചുകളിലെ പശ്ചാത്തല സൌകര്യങ്ങള്‍ - സ്ഥലം, കെട്ടിടം, യുപിഎസ്, ജനറേറ്റര്‍, ബാറ്ററി തുടങ്ങിയവ - പുതിയ ഡാറ്റാ കമ്മ്യൂണിക്കേഷന്‍ ശൃംഖലകളുടെ സെര്‍വ്വറുകളും മെമ്മറി ഫാമുകളും സ്ഥാപിച്ചു് ഇന്ത്യയിലെ വിവിധ ഉല്പാദന-വിപണന-സേവന-ഭരണ മേഖലകള്‍ക്കുള്ള ശൃംഖല ഏര്‍പ്പെടുത്തി അതും അതു് വഴി ഇതര സേവനങ്ങളും നല്‍കുന്നതിനായി ഉപയോഗിക്കാവുന്നതാണു്. അതാകട്ടെ, ഈ രംഗത്തെ മൂര്‍ത്തമായ സാമ്രാജ്യത്വമേധാവിത്വത്തിനുള്ള ബദലാണു്. അതിലൂടെ ഇന്ത്യാ മഹാരാജ്യത്തിനു് നിലവില്‍ സാമ്രാജ്യത്വ ശൃംഖലാ കേന്ദ്രങ്ങളിലുള്ള ആശ്രിതത്വം ഇല്ലാതാക്കാം. ജിമെയില്‍, യാഹു, ഫേസ്ബുക്കു് തുടങ്ങി സാമ്രാജ്യത്വത്തിന്റെ ആഗോള ഭരണസംവിധാനത്തിന്റെ രഹസ്യ ഏജന്‍സികളായി പ്രവര്‍ത്തിക്കുന്ന സാമൂഹ്യ മാധ്യമങ്ങളിലൂടെ മാത്രമല്ല, ഇഭരണം, ഇബാങ്കിങ്ങു്, ഇകൊമേഴ്സു്, ഇട്രേഡു്, ഇമെഡിസിന്‍, ഇവിദ്യാഭ്യാസം തുടങ്ങി സാമൂഹ്യോല്പാദന-വിനിമയ-ഭരണ-സേവനങ്ങളുടെ രംഗത്തും അതി കേന്ദ്രീകൃതമായ ശൃംഖലയിലൂടെ ആഗോളധനമൂലധന മേധാവിത്വം അരക്കിട്ടുറപ്പിച്ചിരിക്കുന്നു. അതവസാനിപ്പിച്ചു് വിതരിത ഘടനയിലുള്ള പ്രാദേശിക-ദേശീയ ശൃംഖല സൃഷ്ടിക്കുക എന്ന മൂര്‍ത്തമായ ബദലാണതു്.

പകരം, ബിഎസ്എന്‍എല്‍ ആഗോള മൂലധന ശക്തികളുടെ ചട്ടുകമായി മാത്രമല്ല അതിന്റെ കമ്പോളമായും മാറുന്ന സ്ഥിതിയാണു് നിലനില്കുന്നതു്. ബിഎസ്എന്‍എല്‍ ഭരണ നിര്‍വ്വഹണത്തിനാവശ്യമായ സോഫ്റ്റ്‌വെയര്‍ വ്യവസ്ഥയും ശൃംഖലയും സ്വന്തമായി സൃഷ്ടിച്ചുപയോഗിക്കാമെന്നിരിക്കെ, ആഗോള കുത്തക ഉല്പന്നങ്ങള്‍ വാങ്ങി വിഭവം പാഴാക്കിയതിന്റെ കഥയാണു് സാപു് (SAP) നടപ്പാക്കിയതിന്റേതു്. 6000 കോടി രൂപ ആദ്യ ചെലവു്. പിന്നീടുള്ള ഓരോ വര്‍ഷവും 600 കോടിയില്‍ തുടങ്ങി നിലവില്‍ 800 കോടി രൂപയിലെത്തി നില്കുന്ന വാര്‍ഷിക സേവന ചെലവു്. പകരം എറണാകുളം എസ്എസ്ഏയില്‍ 2007-2008 കാലത്തു് നടപ്പാക്കിയ അസറ്റു് മാനേജ്മെന്റു് വ്യവസ്ഥ വികസിപ്പിച്ചെടുത്തിരുന്നെങ്കില്‍ രാജ്യമാകെ അതു് നടപ്പാക്കാന്‍ പരമാവധി നാനൂറോ അഞ്ഞൂറോ കോടി രൂപമാത്രമേ ചെലവു് വരുമായിരുന്നുള്ളു. അതും ബിഎസ്എന്‍എല്‍ അതിന്റെ ജീവനക്കാര്‍ക്കും ഉപകരണങ്ങള്‍ക്കും ശൃംഖലയ്ക്കും മറ്റുമായി ചെലവാക്കുന്ന തുക മാത്രം. എറണാകുളം കേന്ദ്രമായി അന്നു് നിലനിന്നിരുന്ന സഹകരണ സംഘം ആ വ്യവസ്ഥ വികസിപ്പിച്ചു് ഉടമസ്ഥതയടക്കം ബിഎസ്എന്‍എല്‍ നു് കൈമാറുകയാണുണ്ടായതു്. അതാണു് സ്വതന്ത്ര സോഫ്റ്റ്‌വെയറിന്റെ മേന്മ. അതു് നശിപ്പിച്ചു് അതിനു് പകരം അതിനേക്കാള്‍ എത്രയോ സൌകര്യം കുറഞ്ഞ സാമ്രാജ്യത്വ കുത്തക സംവിധാനമാണു് പത്തു് മടങ്ങിലേറെ പണം മുടക്കി സ്ഥാപിക്കപ്പെട്ടിട്ടുള്ളതു്. മുടക്കിയ വിഭവത്തിലേറെയും വിദേശത്തേക്കൊഴുകുകയും ചെയ്തു.

എന്തിനേറെ, പടിഞ്ഞാറു് നിന്നായാലും ചൈനയില്‍ നിന്നായാലും ഇറക്കുമതി ചെയ്യുന്ന ടെലിഫോണ്‍ എക്സ്ചേഞ്ചുകള്‍ക്കു് പകരം ഇവിടെ കമ്പ്യൂട്ടറുകള്‍ വാങ്ങി സ്വതന്ത്ര സോഫ്റ്റ്‌വെയര്‍ സന്നിവേശിപ്പിച്ചു് വികസിപ്പിച്ചുപയോഗിക്കാവുന്നതേയുള്ള. ഇതിനാവശ്യമായ ചെലവിന്റെ പതിന്മടങ്ങു് തുക വിദേശ നാണയം ചെലവഴിച്ചാണു് ഇന്നു് എക്സ്ചേഞ്ചുകള്‍ ഇറക്കുമതി ചെയ്തു് സ്ഥാപിക്കുന്നതു്.

ഇത്തരത്തില്‍ ആഗോള-ദേശീയ കുത്തകകള്‍ക്കു് വേണ്ടിയുള്ള ധൂര്‍ത്തും ദുര്‍ച്ചെലവും അഴിമതിയും മാത്രമല്ല, മാനേജ്മെന്റു് പിടിപ്പു് കേടും കാട്ടുന്ന ഭരണാധികാരികളാണു് വരുമാനക്കുറവിന്റേയും നഷ്ടത്തിന്റേയും പേരു് പറഞ്ഞു് ശമ്പള പരിഷ്കരണവും പെന്‍ഷന്‍ പരിഷ്കരണവും നിഷേധിക്കുന്നതു്. എവിടെ പണമെന്നു് അവര്‍ നമ്മുടെ നേതാക്കളോടു് ചോദിക്കുന്നു. എവിടെ പോയി പണം എന്നു് അവരോടു് തിരിച്ചു് ചോദിക്കാനുള്ള ആര്‍ജ്ജവം നേടാന്‍ സാങ്കേതികവും സാമ്പത്തികവും മാനേജ്മെന്റു് തലത്തിലുമുള്ള വിശകലനങ്ങളും പഠനങ്ങളും നടത്താന്‍ സംഘടനകള്‍ തയ്യാറാകണം.

ഇത്തരം വിശകലനങ്ങളിലൂടെ ബദല്‍ നയപരിപാടികള്‍ ഉരുത്തിരിച്ചെടുക്കാനും അതു് ജനങ്ങളോടു് പറയാനും ബിഎസ്എന്‍എല്‍ അടക്കം പൊതു മേഖലയിലെ സംഘടനകള്‍ തയ്യാറാകണം. അതാണു് പൊതു മേഖലയുടെ പ്രസക്തി ജനങ്ങളെ ബോധ്യപ്പെടുത്താനും അതിലൂടെ ഇന്നത്തെ വര്‍ഗ്ഗ ഭരണം അവസാനിപ്പിക്കാനും പുതിയ വര്‍ഗ്ഗത്തിന്റെ ഭരണ നയപരിപാടികള്‍ ജനങ്ങളിലെത്തിക്കാനുമുള്ള മാര്‍ഗ്ഗം. അതാണു് പൊതുമേഖലയുടേയും തൊഴിലിന്റേയും തൊഴില്‍ സുരക്ഷിതത്വത്തിന്റേയും സേവന വേതന വ്യവസ്ഥകളുടേയും സംരക്ഷണത്തിനും മെച്ചപ്പെടുത്തലിനുമുള്ള ഇന്നത്ത ഘട്ടത്തിലെ മാര്‍ഗ്ഗം. മറ്റു് മാര്‍ഗ്ഗങ്ങളില്ല എന്ന മുതലാളിത്തത്തിന്റെ വാദഗതിയില്‍ കുടുങ്ങി കിടക്കുന്ന ബഹുഭൂരിപക്ഷത്തെ ബദല്‍ മാര്‍ഗ്ഗങ്ങളുടെ പ്രയോഗ ക്ഷമത ബോധ്യപ്പെടുത്താനുള്ള ഇടപെടലുകളും ആവശ്യമാണു്. ധനമൂലധനാധിപത്യത്തിന്റെ ഇടപെടല്‍ മൂലം ഹ്രസ്വകാലത്തില്‍ അവ സ്ഥായിയാകണമെന്നില്ല. പക്ഷെ, ഭാവിയുടെ മാതൃകകള്‍ ഉയര്‍ത്തി ജനങ്ങളെ അണിനിരത്തുന്നതില്‍ അതു് അതി പ്രധാനമായ പങ്കു് വഹിക്കുക തന്നെ ചെയ്യും.

ജോസഫ് തോമസ്,

thomasatps@gmail.com

9447738369